Itaktak ang inyong pukot

Ikatulo nga Domingo sa Pagkabanhaw
Buhat 5:27-32, 40-41 / Sal. 30 / Gip. 5:11-14 / Jn. 21:1-19

Unsa kahay hinungdan nga sila si Pedro ug mga kaubang tinun-an mibalik man sa pagpanagat? Posible kaha nga tungod kay naluya sila sa nahitabo nga si Kristo namatay ug wala pa sila makasabot sa kahulogan niini? O kaha tungod kay sila gibati nga mas hawod silang managat kaysa magsangyaw sa pulong sa Dios? Ngano kaha nga daw gikalimtan nila ang kainit sa paghimo sa gisugo ni Hesus nga sila managat og tawo pinaagi sa pagsangyaw sa pulong sa Ginoo?

Apan sa dihang wala silay nakuha tibuok gabii ug si Hesus miingon kanila nga itaktak ang ilang mga pukot, nakakuha silag daghan kaayong isda. Ug didto nabuka ang ilang mga mata ug nakaila sila nga si Hesus diay kadto.

Samtang nagsingabot na ang piniliay, daku gayod ang temtasyon nga kung dili kita makasabot sa dagan sa kinabuhi maluya kita ug mokontento na lamang sa unsay naandan. Dili na lamang kita mangitag paagi imbis nga mahagit kita sa pagdiskubre sa unsay mahimo nga mas makaayo sa katilingban ug sosyodad. Usahay gani, mawad-an kitag gana nga maningkamot pa pag-ayo kay alang kanato hasul ug budlay na kaayo. Usahay usab, dili na kita andam mokat-on aron moasenso, ug magpabilin na lamang kita sa naandan ug moingon nga “nabuhi bitaw kita kaniadto nganong maghago pa man gayod kita?”

Sakto gayod ang giingon ni Santo Papa Francisco nga ang pagkakontento makadani. Kini nagdani kanato nga wala na kitay mahimo kay naanad na kita sukad kaniadto ug nabuhi man gihapon kita. Apan ang Ginoo kanunay nga naghagit kanato sa pagtaktak sa atong pukot, sa pagpalawod, ug sa pagsangyaw sa iyang kaayo. Ang Ginoo naghagit kanato sa paghimamat kaniya bisan sa dili kaayo nato sinati ug suud, sa pagpangita kaniya diha sa mga kahilitan, ug sa pagdawat kaniya sa kanunay’ng tawag sa pagbag-o.