Flores de Mayo gipangandam

Bag-o pa lang nato nasinati ang panahon sa Kwaresma nga maoy paghandum sa pagpasakit, pagkamatay ug pagkabanhaw sa atong Ginoo.

Karon, gisugdan na usab niadtoang laing kalihukan nga maoy gikahinaman sa atong mga kabataan, ang Flores de Mayo.

Niadtong Abril 13 ug 14, 2019, adunay upat ka mga katekista nga gikan sa Parokya ni San Miguel, Panacan ang gipadala sa gipahigayon nga Flores de Mayo Seminar Workshop didto sa St. Francis de Assisi, La Verna. Ang upat ka mga katekista nga sila Marissa Aliganga, Malyn Dimasuhid, Danihlia Gilbuena ug Glyna Villegas, gitahasan usab nga maoy magre-echo o maghatag og seminar workshop sa atong parokya.

Niadtong Lunes, Abril 22, 2019, gipahigayon ang re-echo sa Flores de Mayo Seminar Workshop, didto sa Seminar Hall 2, San Miguel Parish, Panacan, Davao City. Kini gipangunahan sa PSP Coordinator nga si Marilou Ipal, kauban ang upat ka mga katekista nga maoy maghatag sa inputs, ug inabagan sa Core Group sa PSP Ministry.

Base sa attendance, miabot sa 95 ka partisipante ang niapil sa maong kalihukan, nga kadaghanan mga katekista ug adunay pipila ka mga GSL nga mihulip sa ubang katekista nga dili makahigayon sa pag-apil tungod sa personal nga rason.

Ang Flores de Mayo dili lamang maghatag og higayon sa pagpasidungog ug paghalad og mga bulak kang Birhen Maria. Kini usab maghatag sa mga kabataan og higayon sa paghimamat ug pakiglambigit sa ubang mga kabataan diha sa ilang GKK.

Sa Flores de Mayo usab matudloan ang mga bata sa Espirituhanong aspeto sa ilang kinabuhi nga maoy maghulma ug maggiya kanila, nga sa umaabot nga panahon mamahimo silang madasigon ug mabungahong servant leaders sa katilingban.

Among gipaabot pag-usab ang kinasing-kasing nga pagpasalamat kay Rev. Fr. Pete Lamata, Ate Madelyn Tito ug mga GSL sa St. Francis de Assisi, La Verna, sa mainiton ug maayong pagtagad ug pag-atiman sa upat ka mga katekista nga gipadala sa among halangdon ug ever supportive kura paroko sa San Miguel Parish, Panacan, Rev. Fr. Edsel Paloma. (Liz Gilbuena | SMP Parish Soccom)