Ika-13 nga kapistahan sa Parokya sa Divine Mercy sa Mati alandumon

Human sa pagsaulog sa Semana Santa, tataw kaayo ang kakapoy nga gibati sa parish administrator ug sa matag parokyano ilabina sa mga apostolado niining parokya apan wala kini nila panumbalinga tungod kay gisaulog usab nila ang ika-napulog tulo nga Parochial Fiesta atol sa ikaduhang Domingo sa Pagkabanhaw niadtong Abril 28, 2019 kon Divine Mercy Sunday. Ang tema sa ilang pagsaulog sa kapistahan mao ang: “Filipino Youth in Mission: Beloved, Gifted and Empowered”.

Malampuson ug mabungahon gayud ang pagsaulog sa kapistahan tungod kay sa bispera adunay nahitabo nga pagbunyag nga gihimo ni Rev. Fr. Diomedes N. Lagroma, ang sakramento sa pagkumpirma nga gihimo ni Rev. Msgr. Edito S. Baño – Vicar General, ug ang prosisyon sa imahe sa Diosnong Kalooy ug ni Sister Faustina.

Sa adlaw mismo sa kapistahan gipahitabo ang duha ka misa. Ang unang misa sa alas sais sa buntag nga gipangulohan ni Rev. Fr. Darwey Clark, ug pagka alas nuebe mao ang Episcopal Mass nga gipangulohan ni Most Reverend Bishop Abel Apigo, D.D. uban sa mga pipila ka mga kaparian nga sila Fr. Jacinto Ortiza, Fr. Rey Armasa, Fr. Darwey Clark ug Fr. Medardo Salomia. Makatandog kaayo ang homiliya ni Bishop Apigo tungod kay iyang gipunting ang kamahigugmaon ug kamaloloy-on sa Dios. Matud pa niya, “Taliwala sa atong pagkamakasasala ug mga kalapasan nga nabuhat, mopasulabi ang kalooy ug gugma sa Dios.” Dugang pa niya, ang pulong “Tuo ug ayaw pagduhaduha” maoy basehan nga ang Simbahan mikaylap sa tibuok kalibutan.

Nahimong halangdumon ang selebrasyon sa piyesta tungod kay sa wala pa nahuman ang misa gibasa ni Chancellor Fr. Darwey Clark ang DECREE OF RECONSTRUCTION OF THE CANONICAL ERECTION OF THE DIVINE MERCY PARISH ug gipahigayon usab ang paghatag og CERTFICATE OF RECOGNITION sa mga Hermano ug Hermana, mga pipila ka manggihatagon ug matinabangong pamilya sulod sa tulo ka tuig nga pagdumala ni Fr. Salomia sa parokya sa Divine Mercy. Human sa paghatag og Certificate nagpadayag si Fr. Salomia sa mga pulong pagpasalamat.

Human sa Eukaristikanhong kasaulogan, misunod dayon ang pagpakaon sa mga katawhan nga nagagikan sa nagkalainlaing lugar particularmente sa matag GKK nga nahisakop niining parokya. Pagkagabii gipahitabo ang Free Concert ug Fellowship.

Nahimong malampuson ug mabungahon gayud ang selebrasyon sa kapistahan sa Divine Mercy Parish tungod sa pagpaningkamot sa mga myembro sa Parish Pastoral Coordinating Council (PPCC) nga gipangulohan ni Mrs. Florentina Magpusao uban sa giya sa ilang mapaubsanon ug buotan nga parish administrator nga si Rev. Fr. Medardo A. Salomia. Ang PPCC maoy derekta nga nag-coordinate sa tanang mga kalihokan sa parokya. Matud pa ni Fr. Salomia, “if trust is given to the key people especially the PPCC and they will be given a chance to participate, then, their response is noticeable and they will become empowered”.

Adunay pipila ka hagit usab ang maong pari sa mga parokyano ug apostolado sa Divine Mercy sa iyang pagbiya unya sa parokya karong umaabot sa bulan sa Hunyo, una, unta maimplementar gayud ang Strategic Plan nga nagpadayag sa direction sa parokya pinaagi sa bag-ong gilatid nga Parish Vision, Mission, and Goal.

Ikaduha, makab-ot ang tinguha nga “retablu” kon sanctuary.

Ikatulo, matutukan ug maalalayan ang mga batan-on tungod kay tuig man nila karon, ug ang ika-upat, ang PPCC being the Coordinating Council where the participatory and pastoral management of the parish is being shared through the leaders up to the members of every GKK should continue to perform their responsibilities sincerely and accordingly.

Tataw gayud kaayo nga ang maayong pagtagad ug pagdumala ni Fr. Salomia sa iyang mga gitugyanan og responsibilidad maoy nakapalig-on gayud sa ilang relasyon ug nakapadasig sa paghimo sa mga buluhaton nga malampuson. Klaro pud kaayo nga ang sangputanan sa maayong relasyon mao ang panaghiusa ug partisipasyon diha sa pagkab-ot sa kalampusan sa mga buluhaton sa simbahan ug sa komunidad, ug ingon man sa pagbuhat sa Kristohanong misyon.

Sa katapusan kinasingkasing ang pagpasalamat ni Fr. Salomia sa tanan nga nahimong kabahin sa kalampusan sa piyesta selebrasyon. Nagpasalamat usab siya sa pipila ka mga indibiduwal, mga parokyano ug apostolado sa ilang pag-ampo ug walay puas nga pagpaambit sa ilang bahandi alang sa kaayohan, kausaban ug kalambuan sa parokya sulod sa tulo ka tuig nga iyang pagdumala sa parokya sa Divine Mercy. (Randy Simon Osiba)