Partisipasyon sa mga kabatan-onan gilaman modaghan

April 25, 2019 sa alas siete y medya sa gabii (7:30) unang gabii sa novena alang sa ika-beinte sais (26) ka tuig nga pagsaulog sa kapistahan sa Sta. Cruz sa NHA Buhangin, Davao City. Pero nabalaka na ang among PSK nga si Fe Jayectin tungod kay gamay pa lang ming naa sa kapilya. Nasamot pa ang iyang kahingawa tungod kay gipangitaan siya og mga batan-on sa parish formation team nga mohatag og input sa among Kasaulogan sa Pulong nga si Elena Acolintaba.

“Aduna man goy bahin sa pag-ampo nga ang mga batan-on ang manubag,” tubag ni sister Elena.

“Sige na lang magsugod na ta sa Novena kay mangabot ra lagi to sila kay kahibalo man sila nga karon ang sugod sa Novena kay niattend baya sila sa GSL meeting,” sugyot namo.

Nahuman ang novena ug mosunod na ang KSP pero wala pa ang mga youth officers.

Nahuman na lang ang mga pagbasa ug panahon na para sa input gikan sa formation team pero wala pa gihapon sila.

Gitext na nako ang President pero wala may reply.

Sa dili madugay, adunay mensahe niabot, “Naa diay sila sa St. Peter Panacan nag-attend og vigil sa ilang kauban nga youth sa parokya nga namatay.”

Unsa may among mahimo? So gipangduol na lang sa PSK ang mga batan-on nga murag didto lang pod nabantayan nga miapil kauban ilang mama. Pila ra pod sila kabuok, sila na lang ang gipaapil ug gi-ampoan namong tanan nga nanambong. Nalooy ko sa batang maoy nabutangan og microphone ug nibasa sa gi-andam nga pag-ampo naglisod pa intawon siya og basa pero kalooy sa Diyos nahuman ra gyud tawon niya. Salamat sa Diyos kay wala nihilak. Kataw-anan ba? Dili makatandog gani sa pagbati. Kaabtik ra gani nila nga nitubag sa hagit salamat kanila ug sa mga ginikanan nga miuban kanila kay ug wala pa sila zero ang among unang gabii. Nachallenge ming mga GSL nga dalahon pod namo ang among mga anak sa mga sunod gabii.

Among pag-ampo nga sa mosunod nga mga gabii sa pag-novena modaghan na sila tungod kay ang mga inputs karong tuiga bahin kanilang mga youth. Salamat sa OMPH parish nga timely pod ang ilang mga inputs tungod kay karon “Year of the Youth” man. Pinaagi niini mas masabtan, mailhan pa namo ang among mga batan-on ug unta makab-ot ang pagtinabangay aron mamahimong andam sa mas dako pa nga selebrasyon sa mga tuig nga moabot.

Kamong mga kabatan-onan nga “beloved, gifted, ug empowered” sabay ta ninyo sa panaw padulong sa Ginoo. (Marieta Comighud)