Kalinaw, gasa sa pagtoo sa pagkabanhaw

Ikaduhang Domingo sa pagkabanhaw
Buhat 5:12-16 / Sal. 118 / Gip. 1:9-11a, 12-13, 17-19 / Jn. 20:19-31

Alang niadtong mga mahilig sa FACEBOOK, maobserbahan nato ang daghang mga posts sa pagkulang sa kalinaw. Dunay nag-away tungod sa mga comments nga atong mabasa. Usahay ang pribadong isyu mabulgar sa publiko. Nagdugang kini sa kagubot imbis kalinaw. Sa nagkaduol usab ang piniliay, aduna usab magdautay sa pagkatawo ug gani mohatud pa usahay sa pinatyanay.

Sa Ebanghelyo, makadaghan mipasalig ang nabanhaw nga Ginoo sa kalinaw nga maangkon sa iyang mga tinun-an. Nasayod siya nga napuno sila sa kagubot nga hatod sa pagkulang nila sa pagsabot sa iyang kamatayon. Gibati niya ang kaguliyang nga bunga sa ilang pagduha-duha sa pagtoo nga siya nabanhaw. Nadungog niya ang kahadlok nga naghari kanila tungod sa nasaksihan nilang kasakit nga gipahamtang kaniya.

Ang pagtoo sa pagkabanhaw ni Hesus maoy susi sa kalinaw. Kining maong pagtoo inubanan sa daghang mga milagro sama sa nadungog nato sa unang pagbasa sa mga buhat sa mga apostoles. Ang mga apostoles gitamod tungod sa ilang mga maayong buhat. Sila nakakabig og daghang magtotoo. Busa angay lamang sama nga sa Salmo kita magpasalamat sa kaayo sa Ginoo kay ang iyang gugma walay kataposan. Hinumduman nato kanunay ang iyang pagluwas ug maayong buhat kanato.

Kining maong mga milagro ug maayong buhat gisulat ni Juan sama sa nabati nato sa ikaduhang pagbasa. Iya kining gipaambit dili lamang sa pagsulti kondili sa papel mismo nga hangtod karon buhi sa atong panumduman ang daghang maayong hitabo kaniya aron kita makatoo nga si Hesus nga nabanhaw nagdalag kalinaw.

Ang pagkulang sa kalinaw nagagikan sa kahiladman sa atong kasing-kasing. Ang kagubot sa katilingban hulagway lamang sa kalibog nga atong naangkon sulod sa atong tagsa-tagsa ka kinabuhi. Atong iampo nga magkalalom unta ang atong pagtoo nga si Hesus nabanhaw aron mohari ang kahapsay sa atong kinabuhi. Mosalig kita nga luyo sa mga panagbingkil ug kagubot, ang kalinaw moabot kung mosalig kita nga si Hesus nagbuhat og dakong mga butang sa atong kinabuhi. Sugdan ta sa atong personal nga pagpuyo ang pagkakaplag ni Hesus nga nabanhaw aron atong maangkon ang kalinaw.