Semana Santa Hapsay

Ang kalihukan sa Semana Santa mao ang usa sa mga gihisgutan sa panagtigom sa mga Pangulo sa Katilingban (PSK) sa Parokya sa St. Mary of the Perpetual Rosary kaniadtong Dominggo, Abril 7, 2019.

Ang hugot nga gipangandaman mao ang Dalan sa Krus panahon sa Biyernes Santo tungod kay lahi kini sa mga niaging pagselebrar sa maong kalihukan. Karong tuiga adunay tulo (3) ka ruta ang ipahigayon diin ang unang ruta magsugod sa GKK San Roque, Cabantian, ang ika-duhang ruta magsugod sa GKK San Isidro Labrador, Ciudad de Esperanza ug ang ika-tulong ruta magsugod sa GKK Birhen sa Medalla Milagrosa, Tigatto 9. Ang mga responsable nga mga GKK Servant Leaders (GSL) mao ang mga PSK ug PSL diin sila ang mohukom kung diin ibutang ang matag estasyon. Ang ika-duha ug ika-tulong ruta ipahigayon ang “common station” sa ika-onse ug ika-dose nga estasyon, inig-abot sa ika-trese nga estasyon “common station” na pud kini sa tulo ka ruta diin magdungan na ang tulo ka ruta padulong sa katorse nga estasyon didto sa Shrine of Our Lady of the Most Holy Rosary.

Ang PSL in-charge sa kada ruta nga sila Bong Lupo, Naldo Villodres, Cesar Buagas maoy gitahasan sa pagsukod sa gilay-on sa ilang ruta aron mahibaw-an unsang oras magsugod ang dalan sa krus aron nga magdungan pag-abot sa ika-trese ka estasyon. Usa pud sa kabaghoan nga gipangandaman mao ang tarpaulin nga gibuhat alang sa mga estasyon tungod kay gamay ra ang estampa sumala pa sa Kura Paroko, Fr. Dionisio C. Tabiliran tungod kay kinahanglan nga taas ang maong mga larawan aron makita sa mga katawhan inig pag-ampo sa dalan sa krus.

Nanghinaut ang PSK parish coordinator, Dionisio Daro nga magtinabangay ang tanang GSL sa maong kalihukan aron hapsay nga mapahigayon ang dalan sa krus ug uban pang kalihukan sama sa prosisyon sa Santo Entiero nianang adlawa. (Hermie Mapute | SMPRP SoCCom)