GKK sa San Roque Kadayawan nagpahigayon sa ilang ikaduhang youth camp

Sa ikaduhang higayon, ang GKK sa San Roque Kadayawan nga sakop sa parokya sa Our Lady of Lourdes sa Bangkal mipahigayon sa ilang Summer Youth Camp niadtong Abril 19-20, nga may temang “Strengthening the Unity of the Youth in the Service of the Lord.”

Ang maong overnight camp diha sa tugkaran sa ilang kapilya gisalmotan sa 36 ka mga batan-on nga sakop sa GKK sa San Roque.

“Ang tumong niining youth camp mao ang pagtubag sa hagit sa among Kura Paroko nga buhion pag-usab ang among katilingban sa San Roque, ug nga ang mga batan-on sa among GKK mahimong mas aktibo sa tanang kalihukan dinhi sa among kapilya,” matud pa ni Romel Biliran, ang PSB sa GKK San Roque.

Diha sa maong camp gipasabot sa mga batan-on kung unsa ang ilang papel ug responsibilidad isip mga miyembro sa katilingban. Pinaagi sa mga talks, gipalalom sa mga speakers nga diha sa ilang pagserbisyo ug pagpaambit sa ilang mga talent, nakatabang sila dili lamang sa pagpalambo sa ilang komunidad apan diha usab sa ilang kaugalingon paglambo ug pagdako. Dili usab mawala ang amazing race ug lain pang mga teambuilding activities nga maoy nagdugang sa kalingaw sa mga batan-on.

Ang maong camp gitapos human sa sinimanang Kasaulogan sa Pulong pinaagi sa usa ka search, ang Mr. and Ms. Pobreng Uyamot diin matag team adunay usa ka pares nga magrepresentar sa ilang grupo. Matag pares nirampa suot ang ilang gisi-gisi nga mga sinina nga daw mga pobre gayud. Nagpakita usab sila sa ilang mga nagkalain-laing mga talento ug kahanas sa pagtubag sa question and answer portion. Una matapos ang gabii, midaug isip Mr. and Ms. Pobreng Uyamot sila Jayson Siscar ug Marileah Angeli Comidoy.

Sukad sa unang youth camp sa maong GKK nga gipangulhan ni Sem. Joseph Serreno, ang GKK sa San Roque maoy pinakauna ug nag-inusarang GKK nga sakop sa parokya sa Our Lady of Lourdes nga nagpahigayon ug youth camp.

By Dyester Abo-abo/Contributor