Gitawag kita sa kanunay nga pagbag-o

Ika-3 nga Domingo sa Kwaresma
Ex. 3:1-8, 13-15 / Sal. 103 / 1 Cor. 10:1-6, 10-12 / Lk. 13:1-9

Sukad pa sa Daang Kasabotan hangtod karon, lisod sabton nga ang mga kadaot maoy pagsilot sa Dios sa mga dautang tawo. Kung ang mga dautang hitabo pagsilot pa sa mga tawong dautan, nganong duna may mga tikasan o mga limbongan nga niasenso? Nganong duna may mga tapolan nga nadato o mga dili hinimbahon nga maayo og kahimtang? Ngano kaha nga duna may mga maayong tawo nga nag-antus o mga dili mosigarilyo nga masakit sa baga? Nganong nag-antus man si Kristo sa krus?

Dili diay gayod silot sa Dios ang mga dautang hitabo ngadto sa tawo, kondili adunay personal nga responsibilidad ang tawo matag higayon nga siya mahiagum sa dautan. Dili Ginoo maoy angayan nga pasanginlan kung ang tawo nadisgrasya o nahitumpawak sa dautang hitabo. Ang matag desisyon sa tawo maoy dako nga hinungdan sa iyang padulngan. Ang matag pagpili sa buhaton sa tawo maoy dunay dakong parte sa iyang sangputan. Kanang desisyon ug lakang mamahimong personal lamang o kaha dunay kalambigitan ang duot sa katawhan.

Mao nga sa unang pagbasa giawhag kita nga mailhan ang Ginoo nga adlaw-adlaw nagpadayag isip atong Dios, ang Dios nga nagpalingkawas kanato sa kaulipnan sa sala ug sa dautan. Siya nagtawag kanato sa pagbag-o. Sa ikaduhang pagbasa gipahimangnuan kita sa dili pagbalewala ni Kristo nga mao ang bato nga naghatag kalig-on kanato. Dili unta nato hikalimtan ug biyaan ang pagkamanunayon diha sa Ginoo aron kita maluwas.

Kining panahon sa Kwaresma dili unta mahimong higayon nga pasanginlan nato ang Ginoo ug ang ubang tawo sa atong mga kasakit o kadaut nga nasinati. Kondili, panahon unta kini sa pagsusi sa kinahiladman natong pagkatawo aron madawat nato ang atong mga sala ug magbasol aron kita mabuhi pag-usab isip mga anak sa Dios. Kung dili kita magbag-o mahitumpawak usab kita sa dakong trahedya.