LCCP Convention 2019

Theme: “Filipino Youth in Mission: Beloved. Gifted. Empowered.”

Usa sa mga dili kabayran nga oportunidad ug pribilehiyo ang pagserbisyo sa Ginoo. Sa dili maihap nga grasya nga atong nadawat gikan Kaniya, angayan lamang nga Siya pasidunggan pinaagi sa pagserbisyo diha sa Santos nga Eukaristiya. Adunay daghang paagi nga atong ibalik sa Ginoo ang mga grasya, ug usa na niini ang mamahimong usa ka Lector, Commentator, Choir Member, o Salmista.

Niadtong miaging Sabado, Marso 2, 2019, gipahigayon ang ika-12 nga Lectors, Commentators, Choir Members, and Psalmists Convention sa Saint Francis Xavier – Regional Major Seminary, diin gitambungan kini sa kapin 1,900 ka mga alagad sa pagsangyaw sa mga Pulong sa atong Ginoo. Ang tema sa maong convention mao ang “Filipino Youth in Mission: Beloved. Gifted. Empowered.”

Gipasalamatan usab ni Abp. Valles ang mga LCCP Members diha sa ilang walay puas nga pagserbisyo sa simbahan

Sa homiliya, gitagaan ug duo ni Abp. Romulo Valles, DD, ang importansya sa mga LCCP members sa simbahan. Matod pa niya, dako ang gigunitan nga responsibilidad sa mga LCCP members kay sila ang mga in-charge sa liturhiya diha sa mga parokya. Walay kahulugan ang atong pagserbisyo isip lector kung dili nato “ma-gets” nga ang atong gialagaran mao ang lihok sa simbahan — ang liturhiya — kay mao na kini ang nature sa atong simbahan — mao kini ang front desk sa atong simbahan.

Kada basa ug kada kanta nato diha sa Santos nga Misa, atong ginasangyaw ang kamatuoran nga kitang tanan binuhat sa Ginoo, gibendisyonan sa Ginoo, ug naghatag og daghang mga grasya. Nan, mahimayaon ang kinabuhi sa tawo kung kanunay kining mahidool sa grasya diha sa pagserbisyo sa Ginoo.

Gidungag usab sa Arsobispo nga ang pag-alagad diha sa LCCP makatabang sa atong katawhan sa pagsinati sa maluwasnong presensya sa Ginoo diha sa liturhiya sa Simbahan.

Busa, bisan pa man sa kapit-os ug mga katalagman nga atong maagian sa atong pagpakabuhi niining kalibutana, atong hinumdoman nga ang Ginoo andam kaayo mutabang kanato. Ug maski unsa pa man ang atong maagian, atong huna-hunaon nga ang grasya sa Ginoo maanaa kanato kanunay, hilabina sa mga tawo nga andam muserbisyo ug mualagad Kaniya.

SA LAING BAHIN, gikalipay og dako ni Rev. Fr. Joel Caasi, Director sa Archdiocesan Liturgical Center ug mamumulong atol sa maong panagtigom ang aktibong partisipasyon sa mga kabatan-onan dili lamang atol sa 12th LCCP Convention apan lakip na usab sa Ministriya.

“Akoa gyud na namatikdan nga atol niining panagtigom sa nagkabaga na gyud ang mga batan-on, kinsa nahilambigit sa pagsangyaw sa maayong balita pinaagi sa pagbasa sa Bibliya; so mao kini ang very inspiring presence of young people proclaiming the good news haom nga gisaulog ang Year of the Youth sa simbahan sa Pilipinas,” siya midugang.

Matod niya ang hagit pod tingali karon mao ang pagbutang sa kasingkasing pinaagi sa pagbasa sa Pulong sa Ginoo nga atong madungog pinaagi sa pagbasa ato usab nga makita sa konkreto nga pamaagi diiha mismo sa tagsa-tagsa ka kinubhi sa mga lectors, commentators, psalmists ug choir members, dili man sila perpekto apan bisan sa ilang pagka-huyang dinha makita-an nga Ginoo gayud ang importante ug labaw sa tanan.

Dugang pa niya nga plano usab sa ALC mao ang pag-awhag sa ubang mga magtotoo nga motabang sa maong ministriya. Matag saulog sa misa, duna gyud tay pagbasa sa Pulong sa Ginoo, gikinahanglan gayud nga dunay mobasa sa tanang mga kalihukan sulod sa simbahan.

Gidasig usab ni Fr. Caasi ang mga composers nga maghimo og mga kaugalingon nga mga komposisyon.

Gihagit niya ang tanan nga mobalik sa pagbasa sa Pulong sa Ginoo, “let’s take the Word of God as our food for the soul and our food for everyday life.” (Jeffren B. Miguel and Annie S. Libres)