Pagmata sa Kamatuoran

Ikaduhang Domingo sa Kuwaresma
Gen 15:5-12, 17-18 / Ps 27:1, 7-8, 8-9, 13-14 / Phil 3:17–4:1 / Lk 9:28-36

Ang Ebanghelyo nag-paabli sa atong mga mata nga si Jesus mismo, sa dihang moatubang na sa labing malisod nga bahin sa iyang kinabuhi nga mao ang iyang kamatayon, nangita ug iyang kapangayoan sa kasigurohan sa iyang pagabuhaton. Nahibalo siya nga aduna na siyay gamay nga grupo nga iyang mga suod human nga gipangutana niya sila kon kinsa siya diha sa ilang kaugalingon. Nahibalo sila nga Siya gayud ang Mesias… ang Manluluwas — ang Hinilogan, apan daw kulang pa ang ilang pagkasabut niining tanan. Niining tungora sa Ebanghelyo si Jesus nakitagbo sa dagkong mga tawo diha sa Karaang Kasulatan sama kang Moises ug kang Elias. Si Moises ang manluluwas sa mga Israelitas, samtang si Elias ang profeta nga naghisgot mahitungod sa umaabut nga Manluluwas. Makutlo nato dinhi ang mahinungdanong buhaton kon aduna kitay mga desisyon o plano nga pagahimoon ilabina mahitungod sa atong kinabuhi nga nahilambigit sa atong relasyon sa Dios ug sa isigkatawo. Pagpangayo og tambag sa mga tawong gituohan nga makatabang kanato.

Sa laing bahin, aduna kitay makutlo usab sa nahitabo sa mga tinun-an sa diha nga si Jesus nakig-istorya kang Moises ug kang Elias. “Nahikatulog pag-ayo si Pedro ug ang iyang mga kauban, apan nahigmata sila ug nakakita sa himaya ni Jesus. Daghan ang kahulogan sa pagka-hikatulog nga atong matun-an. Mahimong nahikatulog kita kon kita nagduda sa atong isigkatawo. Ang pagduda, makababag sa atong pag-ila sa kamatuoran. Mahimo usab nga ang paghikatulog mao ang pagtinapulan. Dili kita buot mogamit sa atong panghunahuna aron sa pagtuon, mahitungod kang Cristo o mahitungod sa atong pagtuo. Dili kita buot nga mobansay sa atong natun-an nga pagtulon-an tungod kay kinahanglan nato ang pagpaningkamot ug kusog. Ang tapulan, dili maningkamot ug mogamit sa kusog, kay kapoy lagi. Mahimo usab nga ang paghikatulog mao ang paghigugma nato sa sayon nga kinabuhi. Walay pagpaningkamut nga molambo. Kon unsa may naa, kontento na kita. Nganong modugang pa man ug pagtuon? Husto na, aron wala kaayo buhaton. Sukwahi kining tanan sa kinabuhing Kristohanon. Ang kinabuhing Kristohanon, makatagamtam sa kasubo, sa gugma, ug sa panginahanglan. Ang kasubo, makapaghigmata kanato sa pangandoy sa kalipay. Ang gugma, makapa-abli sa kaanindot sa kinabuhi. Ang panginahanglan, makapa-igmat kanato sa pagpangita sa atong kadangpan. Makapadagan, ug makapasinggit kanato ngadto sa pagpangayo sa panabang ug kalooy sa Dios. Busa, sa kanunay atong iampo kining mosunod: “Ginoo, ablihi kanunay ang akong mga mata. Amen.” (Sr. Rica G. Dalaguit, fsp)