Ang Dios Nangita Sa Nahisalaag

Kung dunay mobisita nga artista o inilang tawo sa kadaghanan, maningkamut gayod kita sa pagdutdot bisan sa daghang tawo aron kita makakita. Mopwesto dayon kita aron lamang makakita ug kung pwede magpalitrato sa sikat nga tawo.

Si Saqueo nakadungog sa kasikat ni Hesus apan kay mubo man siya nga tawo dili makakita kang Hesus Kaniya tungod sa duot sa mga tawo. Mao nga mikatkat siya sa kahoy kay nangandoy man siya kang Hesus. Sa dihang nakita siya ni Hesus, giimbita siya ni Hesus nga mokanaog ug moadto sila sa ilang balay. Ug si Saqueo midawat kang Hesus diin daghan ang nagbagulbol kung nganong mibisita si Hesus kang Saqueo nga giila nga makasasala. Siya nanumpa nga mohatag sa kabus human siya nagmalimbongon.

Dunay mga higayon usab nga kita mahisama kang Saqueo nga nanginahanglan dawaton. Apan usahay dili kita makakita sa kahayag tungod sa atong kaugalingong kalipay, hinakog nga panglantaw, ug garbo. Mokatkat hinuon kita sa atong kinaugalingon nga pagsalig ug pagkamapahitas-on. Usahay usab, imbis buot kita mobalik sa katilingban, mabati hinuon nato ang pagsalikway sa kadaghanan. Dili usahay mabati sa uban nga kita nanginahanglan sa ilang pagdawat.

Apan si Kristo naghatag kanato og kaisog nga mokanaog sa atong gitungtongan nga kahoy sa garbo. Kita gidapit ni Kristo sa kanunay sa pagpaubos diha sa pagpaminaw sa Iyang Pulong, sa pag-apil sa kalihukan sa katilingban, sa pagtabang sa mga nanginahanglan ug uban pang maayong buhat. Sa unang pagbasa nadungog nato nga Siya ang Dios nga andam kanunay pagdawat kanila nga nangandoy sa kabag-ohan tungod kay Siya maluoy. Sa ikaduhang pagbasa, kita gipahimangnuan sa kanunay pag-nampuay isip katilingban aron mahimo kitang takus ug angayan sa tawag sa Dios. Diha sa atong mga maayong buhat kita maghatag himaya sa Dios nga Magbubuhat. Ato untang pasudlon si Hesus sa tagsa-tagsa nato ka kasing-kasing kay Siya ang Dios nga nangita sa mga nahisalaag.