Subaya ang dalan sa krus

Nasayod ka ba unsa ang dalan sa krus? Nagaapil ka ba sa dalan sa krus? Unsa may epekto niini sa imong kinabuhi?

Ang Dalan sa Krus kon Via Crucis mao ang debosyon sa mga magtutuong Katoliko nga naghandum sa mga katapusang adlaw ni Hesukristo. Naglangkob kini sa 14 ka mga yugto sa pag-antus ni Kristo nga gitawag og 14 ka mga estasyon.

Human sa pagsaulog sa Miyerkules sa Badlis, matag Biyernes giawhag ang mga parokyano diha sa ilang parokya ug ang mga miyembro sa Gagmay’ng Kristohanong Katilingban (GKK) nga maghimo niini diha sa ilang mga GKK. Gidapit usab ang tanan sa pagsalmot niini sa Adlaw sa Biyernes Santo.

Kini ang pipila nga mga kasinatian sa dalan sa krus sa mga lumilihok sa Davao Catholic Herald ug DXGN:

“Seminarista pa ko nisalmot sa dalan sa krus. Kung naay kaakuhan sa Ginoo, ihatag gayod niya labina kung ubanan sa sakripisyo. Ang akong pag-ampo diha sa Via Crucis sa miaging tuig diin nagtiniil ako mao nga ako maminyo ug nga ang akong amahan nga mipanaw na tuig 2011 mahilangit na unta.” (Jhong Magdaherin, Advertisement)

“Maka-relate ko sa pagpasakit ni Hesukristo diha sa dalan sa krus. Pag-apil nako matag Biyernes Santo napahinumdoman ako sa akong mga sala ug sa dakong gugma sa Ginoo bisan padayon akong nakasala. Makatandog kaayo labina kung i-dramatize kini.” (Gie Rhea Jadulco, Bookkeeper)

“Dili ko nagaapil sa Via Crucis bisan miagi kog altar boy kay Domingo lang ko naga-serve. Sa dihang sa Catholic Herald ug DXGN na ko, mas nasabtan nako ug mas familiar na nako kini labina nga naga-cover mi ani matag Biyernes Santo. Bisan diay naay mga problema, daghan diay ang solusyon ug grasya.” (Vencent Eliguin, Driver and liaison)

“Pagka-high school ko gikuyog sa akong lola aron moapil sa Via Crucis. Pero mas nahimong dunay kahulogan niadtong youth na ko sa among parokya, labina kung i-dramatize ni. Sakripisyo kaayo pero rewarding. Sakit palandungon ang pag-antus ni Kristo pero duna diay paglaum kay siya gani nag-antus man.” (Analie R. Plaza, Secretary and Cashier)

“Gidala ko sa akong mama sa Maa sa una. Okay lang. Wala ko kabalo nga mao diay to ang kaagi ni Kristo sa sakripisyo hangtod nga sa dihang nagtrabaho na ko sa DXGN nasabtan nako nga mao diay to ang kinabuhi ni Hesus sa kalbaryo.” (Karl Ingan-eng, Chief Technician)

“Ang akong teacher sa high school human sa Miyerkules sa Badlis paapilon mi sa eskwelahan bisag init pa mga alas 4:00 sa hapon aron mag Via Crucis. Wala pa dayon nako nasabtan ang kahulogan. Pagtan-aw nako sa salida nga The Passion of the Christ didto pa nako nabati bisan naglagot ko kay naay naga-comment nga akong katapad samtang nagsalida.” (Francis John Palar, Layout artist and circulation)

Sa imong kasinatian, natabangan ba pod ka sa imong inahan, apuhan, maestro, ug kauban sa trabaho sa pagpaila ug pagpasabot sa kaimportante sa Via Crucis kon dalan sa krus? Dili ka ba moapil niining debosyon sa dalan sa krus sugod karong Biyernes?