Unang Misa Pasalamat ni Bishop Ronald “Bong” Lunas, D.D.

Eksaktong lima ka adlaw sukad sa iyahang ordinasyon sa pagka-Obispo niadtong Pebrero 11 niining kasamtangang tuig 2019, si Most Reverend Ronald “Bong” Lunas, DD nagpahigayon sa iyahang unang Misa-Pasalamat sa St. John Paul II Sub-Parish, Inawayan, Sta. Cruz, Davao del Sur. Uban diha sa iyang pagsaulog sa Santos nga Misa niining ika-disesais nga adlaw sa bulan sa Pebrero sa alas 06:30 sa buntag ang mga Rogationist Fathers nga sila Rev. Fr. Ruel Desamparado, RCJ, Rev. Fr. Carlo Balaguer, RCJ, Rev. Fr. Giulio Bellarmino, RCJ, Rev. Fr. Ronald Masilang, RCJ, Rev. Fr. Antonio Nocellado Jr., RCJ ug Rev. Fr. Sherwin Valenzuela, RCJ.

Napuno ang simbahan sa mga parokyano ug magtotoo kung diin buot nila makita, madungog ug mabati ang tingog sa bag-ong obispo nga kaniadto usa sa mga pari nga nagaserbisyo sa maong sub-parish. Naila si Bishop Bong isip usa ka yano, buotan ug maalagarong pari nga maoy nagpaduol kanila ngadto sa mga kasing-kasing sa mga tawo. Gihigugma usab siya sa katawhan tungod sa iyang maundanon ug mabulukong homilya sa matag higayon nga siya magmisa sa simbahan.

Sa iyang homilya gipaabot ni Bishop Bong nga sa pagkatinud-anay wala pa siya naanad nga tawgong “bishop” ug ang katikaran sa niaging mga adlaw wala pa ni tuhop diha kaniya. Dugang pa niya nga ang iyang pagka-obispo natuman dili tungod kaniya kundili tungod sa kabubut-on sa Diyos. Sa iyang pagpamalandong, ang pagka-obispo usa ka misyon nga gisang-at diha kaniya sa pagpangulo sa dakong panon sa katawhan sa Diyos ug dili igo ang iyahang katakus sa pagbuhat niini sa iyahang kaugalingon tungod nanginahanglan usab siya ug panabang sa katawhan nga iyahang gidala. Sigun niya nga siya dili pa andam apan dako ang iyang pagsalig sa Ginoo nga maoy magpahiluna kaniya niining tanan uban sa katawhan nga mag-andam niini. “Ang Ginoo kanunay mag-uban kanato. Emmanuel! God is with us!” dugang pa niini.

Gidasig ni Bishop Bong ang mga magtotoo sa makanunayong abli sa pagsuporta ug pagsunod sa mando sa kaobispohan ug ilabina sa mga kaparian ug lideres diha sa simbahan alang sa katumanan sa kabubut-on sa Diyos. Gipadayag sa obispo nga ang mga katuyuan sa simbahan dili lamang mahitungod kanila kundili mahitungod sa tanan nga nahisakop diha sa simbahan. Nagmapasalamaton si Bishop Bong sa St. John Paul II Sub-Parish tungod sa paghatag kaniya ug higayon nga nakaserbisyo diha kanila ug nahimong parte sa iyang kinabuhi.

Usa matapos ang Santos nga Misa nagpadayag sa pagpasalamat ang administrator sa maong sub parish nga si Fr. Ruel Desamparado ngadto kang Bishop Bong sa dakong paghigugma ug pagpasalamat sa katawhan sa sub-parish diha kaniya. Gipaabot usab sa ni Fr. Desamparado nga sa kanunay magauban diha kang Bishop Bong ang supporta ug mga pag-ampo sa simbahan kaniya isip bag-ong Obispo sa Pagadian. (Glen Miculob | SUGID SoCCom)