Ika-unom nga kapistahan sa Birhen sa Lourdes – GKK sa San Miguel Parish Panacan

Kami malipayon sa kalampusan sa among pagsaulog sa ika-unom nga kapistahan sa among patron Birhen sa Lourdes niadtong Feb. 11, 2019.

Sa wala pa nagsugod ang misa aduna kami gipahigayon nga basketball league, ang team Golden Hills Warriors vs. San Miguel Cavaliers sa team nila Fr. Edsel Paloma. Nagsugod ang dula sa alas otso sa buntag ug nahuman sa alas nuebe y medya sa buntag. Dinuyogan sa kaanindot sa panahon nga walay init ug kusog nga hangin wala kaayo gibati og kakapoy sa kalawasan ang mga nagdula. Sa katapusan nasungkit sa team San Miguel Cavaliers ang kadaugan sa score nga 75 vs. GSW – 45. Aduna usab kami gihatag nga trophy isip pahalipay sa ilang kadaugan ug pagduyog sa amoang kapistahan isip paghimamat usab sa among katilingban.

Nagsugod ang misa sa alas dyes sa buntag ug sa homiliya ni Fr. Edsel siya nagkanayon nga dili gayud kita malimot sa pagpasalamat sa atong Labawng Makagagahum sa mga grasya nga atong nadawat magamay man o madako. Siya usab nagsaysay sa aparicion sa mahal na Birhen nga sa matag pakita niini aduna kini mensahe sa mga katawhan, una, nga iampo ang mga kalag, ikaduha, maghinulsol sa mga sala, ug ang pagka-mainampoon ug makanunayon sa pagrosaryo. Dugang pasabot ni Fr. Edsel nga dili tanan katoliko motoo sa pagkapakita sa mahal nga Birhen pero dili pasabot nga dili na sila katoliko. Katoliko lang gihapon ang dili motoo. Kini usab gi-aprobahan sa simbahan kay dili man kini conflict sa atong pagtoo.

Ug natapos ang among misa sa alas onse sa buntag.

Kami, uban sa mga pangulo ug mga membro dinhi sa GKK BIRHEN SA LOURDES mapasalamaton kaayo sa pagduyog sa among kapistahan sa buong team ni Fr. Edsel Paloma. (Jerame Añasco Carillo ug Ann Oribia | GKK Soccom – SMP Panacan)