Ang matinud-anon nga pagpuyo sa kinabuhing Kristohanon

Ika-walo nga Domingo sa Ordinaryong Panahon
Sirach 27:4-7 / 1 Cor. 15:54-58 / Lukas 6:39-45

Siguro kadaghan ka beses na kita nakadungong sa giingon sa uban nga daghan na karon ang giingon nga “Nominal Christians.” Usa ka pagsabot niining panultihan mao nga ang imong pagka-kristiyanos kutob lamang sa pangalan apan wala diha sa pagkinabuhi o buhat. Miangkon ang usa ka tawo nga siya kristiyano apan dili makita diha sa iyang pagkinabuhi sa matag adlaw.

Ang atong mga pagbasa karong domingoha nag-imbita kanato sa pag-eksamen pag-usab sa atong pagpuyo isip mga binunyagan diha sa simbahan o sa atong pagka-kristiyanos. Kung ato bang napuy-an ang pagkamatinud-anon diha sa atong pagkristiyanos o pagka-sumusonod ni Kristo.

Ang basahon ni Sirach sa atong unang pagbasa tataw kaayo nga misulti nga ang tawo mailhan kung unsa ang anaa sa iyang kasingkasing pinaagi sa mga pulong nga milabas sa iyang mga baba. Siya mailhan kung unsa ang anaa sa sulod sa iyang hunahuna ug kasingkasing pinaagi sa iyang mga buhat nga dayag atobangan sa mga tawo.

Gihisgutan usab sa atong Ebanghelyo ang susama nga sitwasyon nga gisulti sa basahon ni Sirach. Gihisgutan sa atong Ebanghelyo, “Ang matag kahoy mailhan pinaagi sa iyang mga bunga. Kung napuno sa mga maayong butang ang kasingkasing sa tawo, maayo usab ang mahatag, apan kung ang kasingkasing sa tawo puno ug dili mga maayo o dautang mga butang, makita usab kini diha sa iyang mga buhat.”

Kung kini ang atong basehan sa atong gipamalandongan karon, kini nagpasabot nga ang importante nga timailhan sa usa ka kristiyanos nga matinud-anon mao ang iyang pagpaningkamot nga mapuno kanunay ang iyang kasingkasing ug hunahuna sa mga maayong butang nga nagagikan sa kaayo sa Ginoo ug iya kining puy-an diha sa iyang kinabuhi pinaagi sa iyang matinud-anon nga pagsaksi niini diha sa iyang matag-adlaw nga pagkinabuhi. Dinhi makita nga dili lamang kutob sa pangalan ang iyang pagka-kristiyano kung dili nahimo na gayod nga kabahin sa iyang kinabuhi. “It already forms part of his or her very being. In this way, he or she is not only up to calling himself or herself as Christian but also as a true disciple and a real witness to the Gospel.”

Sa panahon karon, lisod kaayo ang pagpuyo nga matinud-anon diha sa iyang pagka-kristiyanos. Daghan kaayo ang mga pagsulay. Daghan kaayo ang mga kalisdanan. Daghan kaayo ang mga prinsipyo nga modaut o mobungkag sa imong pagtoo. Daghang mga tawo usab nga modani kanimo sa pagbuhat og mga dautan ug dili mosunod sa kamatuoran.

Kinsa ang maglig-on kanato sa atong pagpaningkamot nga mahimong tinuod nga mga kristohanon? Miingon si Propeta Jeremias, “Bulahan siya nga masaligon sa Ginoo ug nagalaum kaniya, kay mahisama siya sa usa ka kahoy nga anaa sa daplin sa suba, ug dili siya mahadlok kung moabot ang tag-init ug siya mamunga hinuon sa kanunay” (Jer. 17:5-8).

Si San Pablo sa atong ika-duhang pagbasa karon mipasalig kanato nga pinaagi kang Kristo Hesus nawagtang na ang kalala sa kamatayon ug ang kamatayon napulihan sa kadaugan. Kini ang atong paglaum nga adunay kasigurohan nga nakapondar kang Kristo Hesus. Siya ang maghatag kanato ug kusog diha sa atong pagkinabuhi nga matinud-anon. Siya ang maglig-on kanato diha sa atong pagsaksi sa kamatuoran, kaangayan ug paghigugma. Siya ang kanunay natong kusog sa atong pagpadayon nga mamahimong tinuod nga mga anak sa Dios.

Igsuon, ayaw og sugot nga ikaw kutob lamang sa pangalan ang imong pagka-kristiyanos. Puy-i ang imong gipamulong ug ipamulong ang imong gisaksi aron ang mga tawo makaingon nga ikaw kristiyanos dili lamang sa pangalan kung dili diha usab sa pagbuhat ug pagpuyo niini. Amen. (Fr. Edilberto R. Mahinay)