Pangkalibutanong Adlaw sa mga Masakiton gisaulog

Dungan sa kapistahan sa Birhen sa Lourdes, Pebrero 11, mao usab ang tuig sa pagsaulog sa Pangkalibutanong Adlaw sa mga Masakiton kon “World Day of the Sick” nga gisugdan ni kanhi Santo Papa San Juan Pablo II niadtong tuig 1992.

Ang parokya sa St. Mary of the Perpetual Rosary, sa matag tuig nagasaulog niining maong kalihukan pinaagi sa Sakramento sa Pagkumpisal, Sakramento sa Pagdihog sa mga masakiton, ug ang Sakramento sa Yukaristiya. Tulo ka mga Sakramento ang madawatan sa mga masakiton ug mga edaran. Sama sa panawagan sa Birhen sa Lourdes nga maghinulsol, ug pag-ampo mao usab kini ang giingon ni Papa San Juan Pablo II nga espesyal nga panahon sa pag-ampo ug pagpaambit, sa paghalad sa atong mga pag-antos ngadto sa Dios nga mahigugmaon ug maloloy-on.

Atol niining adlawa, Pebrero 11, 2019 sa kapistahan sa Birhen sa Lourdes, adunay kapin dos sientos ka mga parokyano ang nitambong sa Mass for the Sick and Aged nga gipahigayon sa St. Mary of the Perpetual Rosary Parish, Buhangin. Una gisaulog ang Santos nga Misa gipahigayon ang pagpangumpisal sa alas otso sa buntag ug gisunod dayon ang pagdihog nga gipangunahan sa Kura Paroko, Rev. Fr. Dionisio C. Tabiliran. Ang Santos nga Misa gipangulohan sa Parochial Vicar, Rev. Fr. Rey T. Sabuero nga gi-abagan kini sa Seminarian gikan sa Diocese of Mati nga si Bro. Marlon Requitillo diin dinhi siya na-assign sa iyang exposure program sa REMASE. Gipaambit ni Fr. Rey ang kinabuhi sa Birhen sa Lourdes nga unta mamahimo siyang modelo sa pagka-maampoon ug pagsakripisyo nga dili alang sa kaugalingon lamang kondili alang sa mga nanginahanglan. Pinaagi sa makanunayong pag-ampo unta mamaayo ang mga masakiton ug sa taknang panahon makabalik sa ilang mga gimbuhaton diin mahimuot ang Dios.

Nagmalampuson ang maong kalihukan pinaagi sa pagtinabangay sa mga Parish Coordinators, GKK Servant Leaders (GSL), Caritas, Volunteers nga gipangunahan sa Parish Social Action Ministry (PSAM) coordinator, Bro. Joel Corage. Viva Maria! (Hermie Mapute | SMPRP SoCCom)