San Pablo Parish magsaulog sa ika-36 nga kapistahan

Ang parokya nga nahimutang sa Juna Subdivision niining syudad magsaulog sa ika-36 nga kapistahan, Pebrero 21.

Subay sa tema nga “San Pablo, Sumbanan sa mga batan-on nga gihigugma, gigasahan ug gigamhanan,” ang kapistahan gisaulog atol sa tuig sa kabatan-onan.

Kahinumduman nga niadtong Setyembre 14, 1981 gidonar sa mga Juna heirs ang usa ka ektarya nga lote sa Archdiocese of Davao diin tukoron ang bag-ong parokya.

“THIS STONE WAS BLESSED BY POPE JOHN PAUL II FEBRUARY 20, 1981 ON THIS SITE WILL RISE ST. PAUL CHURCH,” mao kini ang makita sa entrada sa simbahan sa kasamtangang San Pablo Parish.

Kini nagpahinumdom niadtong higayon nga unang mibisita si Pope John Paul II nga karon usa na ka santos.

Niadtong Mayo 13, 1982, giaprubahan ni Archbishop Antonio Ll. Mabutas, kanhing arsobispo sa Davao ang pagtukod sa San Pablo Parish.

Ang maong struktura gidisenyo ni Architect Johnny Sulit ug ang steel structure ni Engr. Eduardo S. Leuenberger.

Pipila ka mga kaparian na ang nahimong kura paroko sa maong parokya ug nakita ang mga kabag-ohan sa struktura niini.

Usa sa mga kabag-ohan nga makita mao ang pagtukod og perimeter fence sa panahon ni Bishop of Ipil Julius Tonel, kanhing kura paroko ug nadugang usab ang belfry kon kampanaryo sa kasamtangang kura paroko nga si Bishop George B. Rimando.

Matag tuig ginapangandaman sa mga lideres ang matag kapistahan ug karong tuiga saulogon usab kini sa mga parokyano nga puno sa pagtoo.

Si Archbishop of Davao Romulo G. Valles maoy mangulo sa Misa sa adlaw sa kapistahan.