Suporta sa Simbahan sa Gobyerno: Sagop Kinabuhi Program 2

Ang Sagop Kinabuhi Program usa ka programa sa simbahan nga nagasuporta sa gobyerno mahitungod sa mga panghitabo sa katilingban nga dili maayo, maong dakong rason nga namugna ang Sagop Kinabuhi Program. Kini nga programa ginapadagan sa Archdiocesan Social Action.

Karon nahimo na kining Sagop Kinabuhi Program 2 o SKP 2. Kining programaha nagatutok sa mga taong gusto maka-recover sa drug dependency nga gitawag nga mga voluntary surrenderee for recovery program nga gusto mausab ilahang mga kinabuhi sulod sa 17 ka semana. Maong miresponde ang Archdiocesan Davao nga maong misyon sa simbahan.

Lakip sa pagtukod sa programa kay ang pagtinabangay ug mga pagpulong sa simbahan kauban ang PDEA, PNP, DSWD, mga barangay, skwelahan, ospital ug uban pang may dakong tabang sa programa.

Dakong pasalamat sab sa simbahan sumala pa ni Fr. Hermie Garcia, SSS nga daghang mi-volunteer sa pagtabang sa maong programa nga ginatawag nilang ‘GABAY’ gikan sa mga GKK ug ubang organisasyon, maong usa sab sa rason sa paglusad sa SKP 2.

Ang gobyerno adunay gimugna nga community based rehabilitation and after care program. Ang simbahan usab adunay community based recovery program. Kini nagpamatuod nga adunay pagtinabangay ang gobyerno ug simbahan sa pagsugpo sa mga di maayong buhat sa nasod.

“Diha nato makita nga gipuy-an sa simbahan ang iyang pagka-simbahan nga dili hamulag sa katawhan, ikaduha nga kanunayng nagmantala sa mga balita nga ang kinabuhi bililhon, nga ang kinabuhi luwason, ang kinabuhi palambuon,” pahinumdom pa ni Father Leonardo A. Dublan, Jr. nga ang kinabuhi kay may dakong importansya nga kinahanglan tagaan og pagtagad.

Kini nga programa nagapahugot pa sa pagtinabangay sa matag usa lakip na ang gobyerno ug simbahan. Kini sab nagpamatuod nga bisag kinsa naay higayon bag-uhon ang kinabuhi nga di maayo padulong sa kinabuhi nga mahimuot ang Diyos. Pamaagi ani nga programa mas daghan pa ang matagaan og higayon nga mas mapaayo ang kinabuhi nga may dako pang kaayuhan ug epekto sa katilingban. (Alodia Luy | HCDC Masscom Intern)