Parish Pastoral Team sa Holy Family Parish Baliok naghimo og Calendar of Activities

Kapoy… makaluya apan makalipay! Mao kini ang gibati sa pipila ka mga miyembro sa Pastoral Team sa Holy Family Parish, Baliok dihang nagtapok aron sa paghan-ay sa mga aktibidad sa parokya sa sulod sa usa ka tuig.

Kini usa ka espesyal nga higayon aron hisgutan ang mga dagkong selebrasyon sa simbahan nga naglangkob sa lahi-lahing aspeto sa pagpalambo sa matag-usa nga nagpunting sa espirituwal nga pormasyon, sosyal nga panginahanglan ug uban pa.

Labawng tumong sa maong pagplano ang maayo ug ensaktong pagpangandam sa mga aktibidad sa simbahan sama sa Mahal nga Adlaw, Anibersaryo sa Katukuran sa Parokya, mga Kapistahan, pagpahigayon og Kasalan sa Parokya, Kumpirma ug First Communion, GSL Formations. Tungod sa paghan-ay sa mga aktibidad, gilauman nga malikayan ang pagsapaw-sapaw sa mga aktibidad nga usahay maoy hinungdan sa panagbangi ug dili maayong pag-implementar sa mga programa.

Nagbunga usab og kadasig ang pagplano sa tinuig nga aktibidad kay makita man gayod ang mga nakalatid nga buluhaton nga makaenganyo usab nga mga lideres sa sayo nga pagpangandam sa mga detalye sa matag aktibidad. Kini usab mamahimong basehan sa matag ministriya ug Gagmayng Kristohanong Katilingban (GKK) sa paghimo sa ilang mga aktibidad nga walay konplikto sa importanteng okasyon sa parokya. Sa tibuok adlaw niadtong Enero 6, 2019 gipaningkamutan sa Pastoral Team nga makab-ot ang tumong sa panagtapok sa paghimo sa plano. Kini natuman gayod kay nahuman ang plano hangtod sa Enero 2020.

Tungod niini malipayong nagpasalamat si Emily Dela Torre, ang GKK Coordinator, sa mga kaubang nagplano nga sila Mr. Rey Ian Sarroza, PSL Coordinator, Mrs. Rolyn Castillo, PSAM Coordinator, Mr. Girard Alag, Finance Committee Coordinator, Mrs. Flor Deloria, Social Communications Coordinator, Mrs. Arnila San Pedro, FLA Coordinator, Mr. Raymond Tandoy, PYM Coordinator, Mr. Arthur Fulguerinas, sa EMHC Coordinator, Mrs. Nenen Podador, PSKB Coordinator, Mrs. Sylvia Lazaro & Mrs. Linda Fernandez sa PSP Coordinators, Mrs. Aster Tumalip sa Bible Apostolate ug Mrs. Maria Luisa Bunda, ang Pastoral Secretary. Tungod sa malampusong buluhaton, nagpasalamat og dako ang team sa suportang gipadangat sa Parish Administrators nga gipangulohan ni Fr. Roger Duhaylungsod, DCD, ang kura paroko. Sa katapusan, nanghinaot ang tanan nga mapatuman ang mga aktibidad sa gimugnang kalendaryo. (Flor Deloria | HFP SoCCom)