Sinulog, halad kang Senyor Santo Niño

Nagpasundayag og usa ka maanindot nga Sinulog Dance presentation ang mga kabataan apostolado sa St. John Paul II Sub-Parish, Inawayan, Sta. Cruz, Davao del Sur niadtong Enero 20, 2019 isip pagsaulog sa kapistahan sa Sr. Sto. Niño. Ang maong pasundayag gihalad ngadto sa Batang-Hesus, isip paghigugma ug pagpasalamat sa katawhan sa tanang grasya nga ilang nadawat ug naangkon.

Gikalipay ug gikahimut-an kini pag-ayo sa mga parokyanong ningsimba diha sa sub-parish sanglit gisayaw kini sa mga kabataan nga puno sa kusog, kalipay ug kasadya nga inubanan sa maanindot nga tugtog ug sul-ob niini. Mokabat ngadto sa kapin upat ka minutos ang maong pasundayag nga nasaksihan sa mga parokyano sulod sa tanang Santos nga Misa niadtong adlawa.

Ang mga maayong reaksyon ug pagbati sa katawhan sa Saint John Paul II Sub-Parish, gikalipay usab sa mga mananayaw nga Parish Youth Apostolate kung diin nabati nila ang dakong suporta ug atensyon nga gihatag ngadto kanila diha sa simbahan. (Glen C. Miculob)