Isangyaw ang gugma

Ikaupat nga Domingo sa Ordinaryong Panahon
Jer. 1:4-5, 17-19 / Sal. 71 / 1 Cor. 12:31-13:13 / Lk. 4:21-30

Ang tawo nga naminaw sa pulong sa Diyos ug nagatuman niini nagapuyo nga mahigugmaon ug kanunay anaa sa kamatuoran. Mao kini ang hagit sa atong mga pagbasa karon. Sa unang pagbasa, ang Ginoo nagdasig kang Propeta Jeremias sa pagsangyaw sa mensahe nga walay kahadlok. Si Propeta Jeremias misalig sa Ginoo ug mituman sa gisulti sa Ginoo kaniya. Sa ikuduhang pagbasa, kita gipahinumduman ni San Pablo sa atong misyon sa pagsangyaw nga kini kinahanglan makagamot diha sa gugma. Ug sa atong Ebanghelyo kita gipahimangnuan ni Kristo sa pagsangyaw sa kamatuoran bisan pa man ang uban dili andam sa pagdawat niini.

Isa sa misyon nga atong naambitan sa misyon ni Kristo diha sa bunyag mao ang pagkapropeta. Sa atong pagkapropeta, kita adunay tahas sa pagsangyaw sa mensahe sa Ginoo. Kita mamalig-on lamang sa maong tahas kung kita maminaw ug motuman sa Pulong sa Diyos. Sa atong panahon karon, dakong hagit kanato ang pagsangyaw sa Pulong sa Diyos. Mao nga kinahanglan nga kita mahigugma niini pinaagi sa pagtuki ug pagtuon aron dili kita malisang atubangan sa mga tawo nga molutos kanato. Kay kabalo kita nga ang Ginoo maga uban kanato ug magluwas kanato.

Ang atong pagsangyaw kinahanglan nagagamot diha sa gugma. Gugma nga madungog sa atong pulong ug makita diha sa atong buhat. Kay walay bili ang atong pagsangyaw kung kini walay gugma. Maninguha kita niining labing bililhon nga gasa nga kita mamahimong mapaulibon, maluluy-on, dili masinahon, dili mapanghitas-on o garboso. Nga mangalagad unta kita nga dili mangita sa atong kaugalingon nga interes aron madayeg ang kaugalingon. Kay ang matuod nga pagpangalagad andam molimod sa iyang kaugalingon alang sa kaayohan sa tanan. Ang tinuod nga pagpangalagad nagapasaylo, nagatuo, nagalaom, ug naga antos. Kay sa atong pagpangalagad kita magasangyaw sa gugma. Dili unta kita kapoyon sa pagsangyaw niini.

Nasayod kita nga ang pulong sa Diyos Gugma ug ang Gugma magdala kanato sa kamatuoran nga maghatag kanato ug kagawasan. Si Kristo nga mao ang pulong ug mao ang gugma nagasangyaw sa kamatuoran mahitungod sa iyang kaugalingon. Apan daghan gihapon ang wala mituo ug mituman kaniya. Kita usab makasinati sa susamang kasinatian ni Jesus. Apan dili unta kita mapakyas sa pagsangyaw mahitungod sa atong Ginoo. Bisan pa man sa kalisdanan nga atong ginasagubang magmalig-on unta kita sa pagpangalagad Kaniya ug sa atong isig kaingon. (Sem. Alcris Panganiban)