Ako Servant Leader, Ako Piniyalan

Pagkaanindot nga gisugdan ang bag-ong tuig sa usa ka Pagpadala sa 808 ka mga GKK Servant Leaders gikan sa 42 ka mga GKKs sakop sa St. Joseph the Worker Parish, Sasa, Davao City. Niadtong Enero 5, 2019 sa alas 10 sa buntag gihimo and Sending Forth alang kanila. Gisaulog ang Santos nga Misa sa Kura Paroko, Rev. Fr. Leonardo, Jr. “Fr. Bong”, uban ni Rev. John Pilonio nga maoy nagrepresenta sa mga pangulo.

Sumala pa ni Fr. Bong sa iyang homiliya nga niining adlawa usa ka pagpadayag isip piniyalan, gitawag, gipadala ug nagpadala. Nagpasalamat siya nga daghan ang mitubag sa tawag, naglihok sa misyon nga gihatag kanato sa Dios, isip usa ka simbahan.

Andam ipadala ngadto sa GKK dala ang panghinaut nga magmalambuon ang inyong pagpangulo. Gidasig niya ang tanan nga litukon pagdungan ang importante kaayo nga pulong “Ako GSL, Ako Piniyalan”. Ang Ginoo mismo ang nagpadala, walay usa kanato nga angay o takus apan tungod sa dakong gugma sa Dios diha kanato possible ang tanan. Gipahinumdum usab nga ang gialagaran mao ang Ginoo.

Gihatag kanato ang kahigayunan nga makaalagad kaniya, mapalawom ang atong pagtuo kaniya. Gitubag ang maong tawag, usa ka kahigayonan mabansay ang atong pagkapiniyalan.

Aron matawag nga maayong pangulo kinahanglan nga maalagaron, mahigugmaon ug mapa-ubsanon nga kinaiya diha sa adlaw-adlaw sa atong kinabuhi. Usa sa mga partisipante, Merlin Flores, SoCCom/Recollection Team member mipaambit sa iyang tumang kalipay, tungod sa oportinidad nga gihatag kaniya nga moalagad isip pangulo sa GKK Birhen sa Fatima, Km. 11.

Gipahigayon usab ang salo-salo o fellowship lunch sa matag sona aron mapalawom pa ang panagsuod sa matag-usa. Nagpasundayag sa ilang talent sa pagsayaw ug pagkanta aron malipay ug malingaw.

Nagmalipayon ang mga GKK Servant Leaders sa ilang pagpauli, kadaghanan kanila nakadawat og mga premyo, pahalipay alang sa usa ka tuig nga malahutayong pagpangalagad. (Amie Desquitado | SJTWP SoCCom)