Ang sekreto sa kalipay

Ikatulong Domingo sa Ordinaryong Panahon
Neh 8:2-4, 5-6, 8-10 / Ps 19:8, 9, 10, 15 / 1 Cor 12:12-30 / Luke 1:1-4, 4:14-21

Ang mga pulong ni Jesus, sa sinugdanan sa iyang pagpangalagad sama sa usa ka homiliya sa usa ka pari nga bag-o pa lamang na-ordinahan — usa ka tema mahitungod sa iyang misyon ug tumong isip pari. Siya nasayud nga siya gitudlo ug gipili sa Dios.

Si Jesus niini nga ebanghelyo nagpadayag sa iyang tawag ug misyon:

Una, siya gidihogan sa Espiritu sa Ginoo.

Ikaduha, nag-alima siya sa mga kabus ug mga hinikalimtan ug hinikawan.

Ikatulo, nga ang Ginoo sa kanunay “Gugma” nga iyang gipakita, pinaagi sa pagmantala sa ‘tuig sa kalooy’.

Diin kini niya nakat-unan? Nakat-unan kini niya sa iyang panimalay.

Atong mahinumduman usab nga iyang nakat-unan ang tanan nga iyang gitudlo diha sa panimalay sa iyang ginikanan: ni Maria ug Jose. Iyang gigahin ang iyang kinabuhi sa pagtuman sa iyang gipadayag nga misyon, kay nakita kini niya sa mga buhat sa iyang ginikanan.

Ang Pulong kinahanglan mamahimong aktibo ug matuman gayud — dili lamang mga pulong nga mahisulat sa papel, apan usa ka mainitong bahin sa atong matag kasingkasing, diin mapadayag og gikinabuhi sa tinuoray ang gugma sa Dios. Mao kini ang nahimong kinabuhi sa Anak sa Dios.

Ang gugma, sama sa mga kondimento nga nakapalami sa pagkaon nga nakatago lamang sulod sa pagkaon. Ang gugma sa Dios nakatago sa ilalom sa kasingkasing sa mga tigpadayag apan walay makababag kon kini ikapadayag na ngadto sa uban ug sa tanan. Mao kini ang sekreto sa kalipay nga anaa sa mga nagdala sa Pulong sa Dios, kon ngano nga sila magmalipayon. Ang sekreto sa kalipay — mao ang kahibalo nga ‘kita gihigugma o ako diay gihigugma sa Dios’. Kini gisilyo sa kasingkasing ni Jesus ug anaa usab sa tanan nga mga kasingkasing sa iyang mga sumusunod.

Kini nga gugma ipakaylap sa iyang mga sumusunod, busa man gani diha sa atong ikaduha nga pagbasa kita gidapit sa pag-ila sa atong kaugalingong mga gasa ug sa diha nga atong naamgohan kining mga gasa giawhag kita sa paghalad niini ngadto sa Dios. Unsay atong mabuhat aron mabansay kini? Mahimong usa ka sugyot alang sa mga batan-on karon sa paghimo ug kasaulogan sa pagpasalamat pinaagi sa pag-abi-abi sa mga magtutudlo sa pagtuo kon katekista, apil na diha sa mga kapilya sa GKK (Gagmayng Kristohanong Katilingban), kay sila ang labing mahinungdanong mga tawo karon nga mao ang nagpadayag sa pagtuo ngadto sa tanan, bata, batan-on man o hamtong. Sila gidihogan sa Espiritu sa Ginoo. Sila nag-alima sa mga kabus ug mga hinikalimtan ug hinikawan. Sila nagpatunhay nga ang Ginoo sa kanunay “Gugma” nga ilang gipakita, pinaagi sa pagmantala sa ‘tuig sa kalooy’. (Sr. Rica Dalaguit, FsP)