Tradisyon, Katilingban, Pamilya

Feast of the Sto. Nino
Is. 9:1-6 / Sal. 97:1-6 / Eph. 1:3-6, 15-18 / Lk. 2:41-52

Matag tuig gisaulog nato ang kapistahan sa Mahal nga Batang Hesus kon Senyor Santo Nino. Kabahin sa pagpangandam nato sa ika-500 nga tuig isip mga Kristiyanong Pilipinhon, hagiton nato ang atong kaugalingon kung unsay atong makutlo sa niining maong paghandum.

Una, nindot nga ang pagpasa sa atong pagtuo kon tradisyon hatagan unta sa matag usa sa igong bili. Ang gibug-aton nga atong gihatag niini magsukad unta sa panig-ingnan bfa gibansay nila Maria, Jose ug Batang Hesus, nga matod pa sa mga pagbasa, matag tuig sila motambong sa pagsaulog sa Pagsaylo. Sila naghimo niining tradisyon isip kabahin sa paghatag og kahulogan sa ilang pagtoo. Pila kaha kanato nga taliwala sa hagit sa kadaghang buluhaton niining panahona magkuyog sa pagsimba isip usa ka pamilya? Pila kaha kanato taliwala sa hagit sa distansiya tungod usahay sa trabaho ug pinuy-anan mahinumdom sa ilang naandang mga kasaulogan?

Ikaduha, maayo nga makat-on kita pag-usab sa kalig-on nga dala sa katilingbanong pagtambayayong. Si Maria ug Jose misalig nga ang mga paryente ug higala maoy gidangpan sa Batang Hesus sa dihang wala nila siya hikaplagi. Bisan tuod nagkulang usab ang katilingban sa pag-atiman sa nahimutangan sa Batang Hesus, hinaut nga mobalik ang pagsalig nato sa atong katilingban. Hinaut nga mabuhi pag-usab ang pag-atiman sa kasilinganan ug pagpahiluna sa maayong kahimtang sa matag usa diha sa katilingban. Diha unta sa katilingban makatabang ang matag-usa sa pagpatin-aw sa atong mga kalibog sama nga ang Batang Hesus nagpakisayod sa mga adunay kahibalo didto sa templo.

Ikatulo, diha gihapon sa pamilya magsugod ang pormasyon. Si Hesus nagmasinugtanon sa iyang mga ginikanan ug mitubo siya sa lawas ug kinaadman. Walay makalabaw sa pundasyon nga pormasyon nga makuha diha sa pamilya. Bisan sa pagkulang sa matag-usa, lahi ra gayod ang panagsuod nga dala sa tinuod nga managsuon uban sa ginikanan. Iampo nato nga ang matag pamilya malig-on diha sa pagkat-on, pagpaminaw ug pagdawat sa matag-usa.

Pit Senyor kanatong tanan!