GKK SoCCom Nalipay

Puno sa kasadya ug kalipay ang gihimo nga unang Christmas Party sa GKK Social Communications Committee (SoCCom) sa St. Mary of the Perpetual Rosary Parish niadtong Disyembre 30, 2018 diha sa St. Mary Parish for Sports and Livelihood Training Center.

Gipahigayon ang Christmas Party sa GKK SoCCom sa dili pa matapos ang tuig 2018 nga adunay tema: “getting to know each other”. Pinaagi niini mahimamat og maayo sa mga GKK SoCCom ang mga kaubanan sa nagkalain-laing GKK nga sakop sa St. Mary of the Perpetual Rosary, Buhangin, Davao City. Hapsay ug han-ay ang gihimo nga programa nga gipangulohan nila Jennifer Locob ug Arsenio Berdera. Adunay parlor games, exchanging gifts ug raffle door prizes diin gipa-ambit sa ubang GKK SoCCom ang ilang grasya nga nadawat sa tuig 2018. Unsay naa sa “getting to know each other?” Yes, sa simpleng dula sa parlor games nga mahimamat ug mailhan ang matag usa diin miyembro sa mga grupo sa GKK nga nahisakop sa laing Zona. Walay pili basta ang tumong nga modaug sa dula. Sadya ug nalipay ang tanan bisan pa man sa simpleng mga premyo. Nindot nga pamati-on nga mahatagan sa katawhan og kahulugan ang diwa sa Pasko nga dili lamang sa material nga aspeto kondili apil ang espirituwal nga aspeto. Busa saulogon nato ang Pasko pinaagi sa pag-inambitay sa mga grasya ug pag-ilhanay sa usag-usa tungod kay si Hesus nagpakatawo uban kanato. Inspired usab ang mga GKK SoCCom sa mensahe sa Parochial Vicar, Fr. Rey T. Sabuero diin iyang gipasalamatan ang mga GKK SoCCom sa paghalad sa ilang kaugalingon ug material nga suporta sa ilang tagsa-tagsa ka GKK diin sila nahisakop ug sa Parokya. Jesus is the reason for this Season! (Arsenia Barimbao | SIL-CDE SoCCom)