PSKB, nag-atiman sa kinaiyahan

Ang kalambuan sa kalibutan nagdepende sa pormasyon sa matag pamilya. Kon maayo ang pagtubo diha sa pamilya, mahimong maayo ang panlantaw sa kinabuhi. Ug kon nagtubo siya nga puno sa gugma, siya usab magmahigugmaon sa tawo ug sa kinaiyahan. Kini karon ang giatiman sa St. Joseph the Worker Parish . Family and Life Apostolate(F & LA) ,Sasa.

Gawas sa pag-atiman sa spirituhanong kalambuan sa pamilya gihatagan usab pagtagad ang “Parish Container Gardening “ diin nahimutang sa atubangan sa F& LA office sa parokya. Sa tinguha nga ang matag pamilya mahigugmaong moatiman sa kinaiyahan nga gihatag sa Dios.
Ang maong pagkahanas sa pagtanum gitudlo ngadto sa mga Pangulo sa GKK ,ilabina sa mga Pangulo sa Kristohanong Banay( PSKB) . Ang nagpaambit sa ilang kahanas sa pagtanum sila ni Kagawad Boy ug Sis Tess Atog. Ang mga miembro nakapahimulos na sa ika-upat na nga higayon nag”harvest” sa tanum nga lettuce. Kini puede na mapupo sulod sa trayienta ka adlaw sukad pagtanum. Gawas nga presko, segurado nga luwas kini sa mga makadaut nga “Chemicals” ug samtang nagdilig ka sa tanum bation nimo ang kalipay,relax ug kalinaw nga nagsud-ong sa pagtubo sa tanum.
Niadtong Oktubre 13 ang mga PSKB nagpahigayon sa usa ka “ Tour and Bonding” . Mibisita sa GKK San Lorenzo Ruiz, Victoria Heights, Mamay. didto mismo sa ilang GKK Chapel makita ang “ Gulayan sa Katilingban” ug halus sa tanan nga panimalay may gulayan sa palibut sa ilang panimalay gamit sa mga Plastic Container sa Mineral water, sako ug styrofoam used Apple box.
Ang tinguha sa PSKB Lead Couple nga sila ni Bro. Edwin ug Sis Malou Pelaez, sa pagdala sa mga membro aron kini madasig ug ma-aghat sa pagtanum og mga gulay sa ilang kaugalingong panimalay, sa ingon mahatagan ang pamilya sa masustansya nga pagkaon , makunhod ang mga basura sa kusina kay “ decompose” aron tambok ang yuta, makatabang sa “ Financial” ug magamit ang mga used Plastic container aron maoy tamnan.
Matud pa ni Sis Tess Atog, moabut kapin dos mil ( 2000+) ang iyang
kita matag”harvest” niya sa Lettuce,Petchay ug pepino ,diha lamang sa iyang nataran.
Mapasalamaton kaayo ang F &LA ngadto sa Barangay Aliongto, Mamay sa ilang pagkamanggihatagon sa kanunay sila ang nagsupply sa mga seedlings ilabina sa Lettuce plant.
Ug ang ikaduhang bahin sa kalihukan didto nahitabo sa Davao Beach Club daplin sa dagat. Puno sa kalipay ang mga PSKB, nag-inambitay sa mga pagkaon sa paniudto , may mga parlor games, nga giapilan sa mga magtiayon, halus tanan nakadawat sa mga premyo.Matud pa ni Fr. Diony Tabiliran, ang KUra Paroko, kinsa miduyog usab sa maong kalihukan nagkanayon sa iyang hamubo nga mensahe,” Ang programa sa F&LA gikinahanglan dayag diha sa parokya, mga programang pampamilya ipahigayon ngadto sa GKK level. Gidasig niya ang mga Pangulo sa Kristohanong Banay sa pagpadayon sa pagpangalagad nga puno sa kadasig ug nga unta sa kanunay ang Dios maoy atong sentro sa atong panghunahuna, mga buhat ug prinsipyo.
Malampusong gitapus sa usa ka mensahe sa PSKB Lead Couple nga nagkanayon, “Tungod kay matapos na ang tuig , ang uban kanato mobalhin sa laing ministriya, karon palang dako nakong pagpasalamat sa inyong kakugi sa pagtuman sa inyong kaakuhan ug sa pagsuporta sa tanan natong mga kalihukan. Hinaut pa ang tanan makugihon nga midawat sa kaakuhan isip mga pangulo sa GKK.”