Paglipay, pagmaya ug pagsadya

Ikatulong Domingo sa Adbiyento
Zep 3:14-18 / Is 12:2-3, 4, 5-6 / Phil 4:4-7 / Lk 3:10-18

Mga igsuon ko diha ni Kristo maayong adlaw kanatong tanan! Anaa na kita karon nagsaulog sa ikatulo ka Domingo sa Panahon sa Adbyento. Sa naandan, ang ikatulo ka dominggo sa panahon sa Adbyento gitawag nga Gaudete Sunday. Ang pulong nga Gaudete gikan sa latin nga pinulongan buot ipasabot “to rejoice” o magmaya. Og aduna kitay igong rason nganong maglipay og mamaya kita karon: kay pipila nalang ka adlaw ato nang saulougon ang pagkatawo sa dugay nang gipaabot nga mesiyas, ang pagkatawo ni Jesus, og magdala siya kanato sa atong gilauman nga kaluwasan!

Ang atong mga una og ikaduhang pagbasa karon nagsentro sa tema sa paglipay, pagmaya og pagsadya! Diha sa atong unang pagbasa karon, atong nadungog ang maayong balita ni Propeta Sofonias ngadto piniling katawhan sa Ginoo. “Awit og kusog, O katawhan sa Sion, O Israel! Pagmaya og paglipay pag-ayo, O Jerusalem!” (Sofonias 3:14). Kining mga pulong ni Propeta Sofonias nagdasig sa katawhan sa Israel nga ang Ginoo labing mahigugmaon sa tanan. Ang Ginoo tunhay nga nahigugma kanila, og tungod niining gugma hatagan sila sa bag-ong kinabuhi. Og diha sa atong ikaduhang pagbasa karon, napuno og kasadya og kalipay samtang si San Pablo nanawagan sa taga Filipo nga magmaya og magpasalamat kanunay sa Ginoo, pinaagi sa pag-ampo og pagpasalamat kanunay sa Ginoo.

Mga igsuon, kining atong mga pagbasa karon, nag-awhag usab kanato sa paglipay og pagmaya kay ang atong Ginoo tinuod gayod nga mahigugmaon sa tanan. Apan, ang pangutana angay lamang ba kita maglipay og magmaya samtang nagpaabot kita sa iyang pag-abot sa atong kinabuhi? Si Juan Bautista naghatag kanatog dugang nga giya unsaon nato pag-andam sa atong kaugalingon sa pag-abot ni Jesus diha sa atong kinabuhi, sa panahon sa pasko. Siya nag-awhag kanato sa pagpaambit sa atong mga ngadto sa mga nanginahanglan ug sa pagtuman sa atong katungdanan nga matinud-anon. Kung unsay anaa kanato karon, malipayon kiya og masadyaon nga ipaambit kini sa uban, sama ni Kristo nga malipayon nga iyang gipaambit ang iyang kinabuhi kanatong tanan. Kung ato kining buhaton, ang atong pagsaulog sa pasko, mahimong tinuod nga masadyaon og mabulokon. Magsadya og magmaya kita, kay hapit na mobaot si Kristo nga atong manunubos! (Rev. Louis Jasper V. Alfeche)