Tingog sa konsensiya

Ikaduhang Domingo sa Adbiyento
Bar 5:1-9 / Ps 126:1-2, 2-3, 4-5, 6 / Phil 1:4-6, 8-11 / Lk 3:1-6

Ang atong kalibutan napuno sa kasaba. Kini tungod sa nagkadaiyang tingog nga atong nadungog sa matag-adlaw.

Saba sa gawas… tingog sa mga tsismoso ug tsismosa… ug saba sa sulod sa panimalay… yawyaw ni mama.

Sa atong Ebanghelyo karon, si Lukas nagbutyag mahitungod sa pag-abot ni Jesus. Iyang gisumada diha sa Ebanghelyo ang pito ka mga gamhanang tingog sa kalibutanon ug relihiyosong kalibutan. Ang ilang mga tingog gamhanan gayud kaayo kay kini nakahimo og kasaysayan. Apan, sa ikaduhang bahin sa atong Ebanghelyo, si Lukas nagpailaila kanato sa usa nga dili ingon ilado apan gamhanan usab nga tingog – ang tingog nga nagsinggit didto sa kamingawan “andama ninyo ang dalan alang sa Ginoo” – ang tingog ni Juan nga magbubunyag. Ang maong tingog gamhanan kaayo dili tungod kay impluwensyado sa katawhan ang nagsinggit kundili tungod sa mensahe sa maong singgit – ang paghinulsol ug pagtuo sa Ebanghelyo tungod kay ang manunubos haduol na. Ang tingog ni Juan nagpalanog sa pag-abot ni Jesus nga maoy makapausab sa kasaysayan ug sa tibuok katawhan.

Saba kaayo ang kalibutan karon tungod sa nagkadaiyang tingog nga atong nadungog. Apan dili nato hikalimtan sa kahiladman sa atong kasing-kasing dunay usa usab ka tingog nga sama ka Juan nga Magbubunyag nga nagtawag kanato sa kanunay sa pagpili pagbuhat sa maayo ug paglikay sa daotan, ug kini nga tingog gitawag nato ug tingog sa atong konsensya. Si Santo Papa Francisco nagpahinumdom nato nga kinahanglan kitang makahibalo sa pagpaminaw sa atong konsensya tungod kay kini ang sulod nga luna sa atong kasingkasing diin kita makabati ug makadungog sa kamatuoran, sa maayo, sa tingog sa Dios. Kini ang kahiladmang dapit sa atong relasyon ngadto Kaniya, kinsa nagsulti sa atong kasing-kasing ug nagtabang kanato sa pagpa-ila, sa pagsabot sa dalan nga kinahanglan natong again ug kon makahimo na kitag desisyon, kita mopadayon sa atong panaw sa kinabuhi ug magpabiling matinud-anon.

Daghan kaayong kadaotan sa kalibutan, diha sa pamilya, ug sa komunidad tungod kay napakyas kita sa pagpaminaw sa tingog sa atong konsensya.

Mga igsoon, mao kini ang rason sa panahon sa adbyento – nga samtang kita nagpaabot sa atong Ginoo, andamon nato ang atong tagsa-tagsa ka kasing-kasing pinaagi sa pagsuta sa atong konsensya karon. Naminaw pa ba gihapon kita sa tingog sa kinahiladman sa atong kasing-kasing nga nagtawag kanato sa paghinulsol ug pagpasaylo? O diba kaha naminaw ra kita sa atong kaugalingon kinsa kanunay nga nangita sa atong kaugalingon nga interes.

Daghan kaayo tang pananglit nadungog nga Maayong Balita mahitungod sa mga taxi drivers nga nag-uli sa mga butang nga nahabilin sa ilang mga taxi. Kining mga klaseng tawo ang atong maingon nga naminaw gayud sa ilang mga konsensya. Sila ang mga tawo nga pagkahuman og pag-ila og maayo sa maong tingog sa kahiladman sa kasing-kasing nahimong mapaubsanon sa pagsunod sa maong tingog nga makapabag-o.

Pipila ka adlaw na lang una ang Pasko (Christmas Day). Makadungog kitag nagkadaiyang tingog – tingog sa mga manaygunay nga gabalik-balik lang ang kanta matag tuig, mga tingog sa atong mga kinugos nga nagpadungog-dungog na sa ilang pinaskuhan; ug ang daghang klaseng tingog sa shopping malls ug basin pang asa ka moadto karon. Hinaot pa unta nga taliwala aning mga nagkadaiya ug klase-klaseng tingog, ato gihapong makaplagan ug madunggan ang tingog nga anaa sa kinahiladman sa atong kasing-kasing nga permanenteng nagtawag kanato sa paghinulsol, pagpasaylo ug sa makanunayong pagpili sa tinuod, maayo ug maanindot – ang atong konsensya. Amen. (Rev. Mark Kim Samones)