“Kabataan: Kauban sa Panaw ug Misyon sa Kristohanong Katilingban”

Masadya nga gisaulog ang ika-20 anyos nga kapistahan sa patron sa GKK Christ the King, BREAD Village, Buhangin sa Nobyembre 24, 2018. Ang maong GKK nahisakop sa Parokya sa St. Mary of the Perpetual Rosary. Ang tema sa maong kapistahan nagkanayon, “Kabataan: Kauban sa Panaw ug Misyon sa Kristohanong Katilingban.” Ang tema gihimo subay sa pagsaulog sa Year of the Youth human sa ika-34 nga Domingo sa Ordinaryong Panahon ug human sa Solemnidad ni Kristong Hari.

Isip pagpangandam sa kapistahan sa Solemnidad ni Kristong Hari adunay mga nakahan-ay nga mga actividades nga gilatid sa mga GKK Servant Leaders (GSL) inubanan sa mga miyembro niini. Nagpahigayon og pre-fiesta assembly Mass niadtong Oktubre 17, 2018 diin ang maong Santos nga Misa gipangulohan ni Fr. Dionisio Tabiliran, Kura Paroko sa St. Mary of the Perpetual Rosary Parish. Ang Santos nga Misa gisaulog una magsugod ang assembly proper aron ihalad kining mga plano sa katilingban ngadto sa Ginoo aron mapanalanginan kini sa Dios ug ang katilingban spiritually prepared sa pagpangandam sa pagsaulog sa kapistahan sa Kristong Hari.

Gisugdan ang pag novena sa patron sulod sa kasaulogan sa pulong niadtong Nobyembre 15, 2018 sa alas siete sa gabii ug kini nagapadayon hangtod Nobyembre 23, 2018. Sulod sa siyam (9) ka gabii nga novena adunay Santos nga Misa nga gisaulog nga gipangulohan ni Fr. Rey Sabuero, ang Parochial Vicar.

Adunay social concern nga actividades nga gipahigayon niadtong Nobyembre 17 sa alas saiz sa buntag mao ang paghatag og libre nga diabetic screening sa mga hamtong ug pagpanghatag og libre nga tambal sa mga bata. Kining kalihukan gipangulohan sa magtiayon nga Fortunato ug Cristina Gogo, ang PSKB sa maong GKK.

Adunay dugang pormasyon nga gihatag ang mga parish formators alang sa mga miyembro sa katilingban mao ang input mahitungod sa Year of the Clergy isip pagtapos sa liturgical calendar year. Ang maong input nakatabang sa paghatag ug dugang edukasyon o kahibalo sa mga kalihukan nga makapalambo sa pagtoo sa matag miyembro sa katilingban.

Sa bisperas sa kapisthan gihimo ang religious procession palibot sa BREAD Village ug sa Nobyembre 24 gisaulog ang kapistahan sa Solemnidad ni Kristong Hari sa GKK pinaagi sa Santos nga Misa sa alas siete sa gabii nga gipangulohan ni Fr. Dionisio Tabiliran.

Ang PSK sa GKK Christ the King, Maria Patricia Boyano ug mga GSL naninguha nga masadya ug mag malampuson ang pagsaulog sa kapistahan pinaagi sa pagsalmot sa mga miyembro sa katilingban sa mga kalihukan niini. VIVA HESUS! (Maria Teresa Lanceta Amor | GKK SoCCom | SMPR SoCCom)