Hagit sa Kabatan-onan diha sa ICC GKK

Dungan sa pagsaulog sa Year of the Youth, gihagit ug nahagit ang mga kabatan-onan sa pagka-aktibo o pagsalmot sa mga kalihukan sa Gagmayng Kristohanong Katilingban sa Imakulada Konsepsyon kon ICC GKK gikan sa pagpangandam ug kasaulogan sa ika-55 ka tuig anibersaryo sa kapistahan.

Malipayong mibulontaryo ang kabatan-onan nga gipanguluhan ni Mary Angeline Balderas nga magpahigayon ug padula sa basketball sa mga kabatan-onan gikan niadtong bulan sa Nobyembre ug pakig-lambigit sa Women’s Group alang sa pagpahigayon ug contest sa mga inahan nga gitawag ug SUPER NANAY.

Gawas sa maong dagko nga mga tahas, gihagit usab ang ilang katakos nila sa Zone 10 Coordinator ug Pangulo sa Katilingban nga si Jimmy Libres nga mo-angkon ug torno sa pagpangandam alang sa Santos nga Misa nga regular nga gisaulog alang sa Zona 10 matag Domingo ug sa umaabot nga Misa de Gallo.

Dili lamang ang kabatan-onan sa ICC GKK ang maningamot alang niini apan hiniusa kining pagahimoon sa mga kabatan-onan sa mga kapilya sa Sto. Nino ug sa Fatima.

Nahimong malampuson nga gipahigayon ang mga kalihukan alang sa kapistahan sa ICC GKK sa basketball tournament ug ingon man sa Super Nanay nga gipangunahan sa mga kabatan-onan. Gituno gilayon nila ang pundo nga nakuha gikan sa maong mga kalihukan ngadto sa ICC GKK isip tampo alang sa kasaulogon sa pista ug ingon man alang sa nagpadayon nga proyekto sa pagpanindot sa bag-ong natukod nga kapilya.

Gibenditahan mismo sa kura paroko sa Ascension of the Lord Parish nga si Rev. Fr. Zenon Ampong ang bag-ong gambalay sa ICC GKK niadtong Disyembre 9, 2018 human sa alas-5 sa buntag nga misa.

Malipayon usab sila nga miboluntaryo nga motaod sa mga hinimo nga mga buntings sa mga nag-unang kadalanan pasulod sa kapilya sa Imakulada Konsepsyon.

Matud ni PSK Libres nga gikinahanglan lamang nga agnihon ug i-apil ang kabatan-onan sa pagplano alang sa mga kalihukan sa kapilya ug sa katilingban aron nga madasig sila sa pagtambong usab sa Kasaulogan sa Pulong ug sa tanang mga kalihukan.