Ika-53 nga tuig sa Kasaulogan sa Pulong, Pangulo sa Liturhiya gisaulog sa Dabaw

Gisaulog sa Archdiocese of Davao ang ika-53 nga tuig sa Kasaulogan sa Pulong (KSP) ug ministriya sa Pangulo sa Liturhiya (PSL).

Subay sa tema nga: “Katambayayong sa Kaparian ug Relihiyoso sa Pagsangyaw kang Kristo” gihimo ang panagtapok sa mga PSL didto sa University of Immaculate Conception, Bajada, Davao City Nobyembre 18 isip pagsaulog sa maong anibersaryo.

Si Fr. Joel Caasi, Director sa Archdiocesan Liturgical Center (ALC) maoy nag-welcome sa mga partisipante nga naggikan pa sa nagkalain-laing bahin sa Archdiocese of Davao.

Si Fr. Marbendear L. Morallas, professor sa St. Francis Xavier Regional Major Seminary (REMASE) maoy tigpa-ambit sa maong panagtapok.

Kahinumduman nga sa pipila ka mga higayon, gipaambit ni Fr. Morallas ang iyang kasinatian isip igsoon sa usa ka PSL didto sa Lamanan, Calinan.

Kabahin usab sa maong panagtapok ang testimonya sa usa ka layko nga si Bro. Henry Evangelista nga usa ka miyembro sa usa sa mga organisasyon nga kabahin sa Archdiocesan Council of Lay Apostolates ang Integrated Movements kon ACLAIM.

Saulogon usab ang Santos nga Misa nga pangulohan ni Archbishop of Davao Romulo G. Valles.

Dako ang panghinaut sa ALC nga mamahimong malampuson ang ilang pagsaulog ug adunay bag-ong nakat-onan ang mga PSL nga maoy tigdumala sa Kasaulogan sa Pulong sa ilang tagsa-tagsa ka mga Gagmay’ng Kristohanong Katilingban (GKK).