Truth Hurts

Ika-34 nga Domingo sa Ordinaryong Panahon
Daniel 7:13-14 / Gipadayag 1:5-8 / Juan 18:33-37

Daghan ang nag-ingon nga “Truth Hurts.” Nganong sakit man? Sakit man jud! Labina kung ang imong binuhatan supak sa kamatuoran! Ang uban usab nasakitan tungod sa ilang gugma nga layo ra jud sa kamatuoran.

Ani nila “forever na” og “happily ever after na,” apan pagkahiman-himan naguba ra sa kamatuoran nga “walay mag dugay na relasyon kon ang usa bakakon, naay laing kaipon, ug dili si Kristo ang pundasyon!”

Mga igsoon ko diha, Kristo ang atong Ebanghelyo karong Domingoha naghisgot mahitungod sa presensya ni Jesus isip Hari ug ang Kamatuoran! Ang Iyang pag-abot sa kalibutan nagsangyaw mahitungod sa Gingharian sa Langit.

Isip Dios, he speaks the Truth! He is the Way, the Truth, and the Light. Mao na, tungod sa iyang pagka-Dios ug magsasangyaw sa Kamatuoran daghan kaayo siya’g nakalaban ug natamakan nga mga mali na binuhatan! Truth Hurts! Tinuod kini! Sakit ang kamatuoran kon si Jesus ang imong kaatbang! Kon kita naay mga binuhatan nga sukwahi sa kamatuoran ni Hesus, Truth Hurts gayod!

Sakit pa sa gibulagan og uyab ug mapandol sa dalan! Ang uban usab dili modawat sa kamatuoran tungod sukwahi sa ilang binuhatan! Kabalong mali ang magsugal, magwalwal ug inom, mangabit, manikas, mangchismis, ug uban pa dira. Hala, padayon gihapon sa binuhatan! Kabalong mali, buhaton gihapon. Masarap ba ang bawal!? Daghan ang nag-ingon lami daw kini! Ug, proud pa kaayo sila niini.

Masarap mag-drugs, lami mangabit, lami mangawat, ug lami mangutang nga dili bayaran, apan, mga igsoon ko diha ni Kristo, isip mga Kristiyanos ug sumusunod ni Kristo, dili jud kini pwede ug sukwahi kini sa Kamatuoran nga gihatag ni Kristo sa atoa.

Ang tinuod na kamatuoran kay ang magbuhat og maayo ug sundon ang mga sugo ni Hesus sa atoa. Kay ang mga pulong ni Hesus mao ra juy makaluwas sa atoa ug makapahilangit sa atoa. Isip atong Hari ug Dios, si Hesus must be our foundation and only model.

Busa mga igsoon ko diha ni Kristo, maningkamot kita nga sundon ug paminawon nato kanunay ang mga pulong ni Hesus sa atoa. Magsimba ug ampo kita kanunay, magbasa kitag Bibliya, ug puy-an nato ang mga pulong ni Hesus sa atoa aron kita maluwas ug makatilaw sa Gingharian sa Langit. Amen.