GKK Seminary Support Campaign sa St. Joseph Parish gilunsad

Positibong mitubag ang mga pamilya sa St. Joseph the Worker Parish, Sasa, sa awhag sa Kura Paroko, Rev. Fr. Leonardo A. Dublan, Jr. “Fr. Bong” nga magtambayayong ang tanan aron maka-tigum og pundo alang sa St. Francis Xavier College Seminary.

Niadtong November 11, Domingo, gilunsad ang GKK SEMINARY SUPPORT CAMPAIGN diha sa Santos nga Misa, alas 7:30 sa buntag, gisaulog ni Rev. Fr. Orlando Angelia, Seminary Rector.

Gipangunahan nila ni Eduardo ug Susan Andoy, Parish FLA Coordinator ug nila ni Edwin/Malou Pelaez, PSKB Lead Couple.

Nagturno ang mga PSKB sulod niining pito ka Misa sa Domingo, adunay lamesa gipahimutang sa atubangan sa Simbahan aron pagpahigayon niadtong buot mo fill-up sa Pledge Card. Giawhag ang matag pamilya sa pagtahan og Php 50.00 pesos o sobra pa niini matag tuig alang sa Seminary.

Kasamtangan ang mga PSKB sa 43 ka mga GKKs sa maong parokya naningkamot aron makakaplag bisan nalang napulo ka mga pamilya nga madasig sa pagtabang. Kining maong kalihukan usa sa mga giatiman sa mga PSKB, aron unta ang tanan maka-amgo sa ilang katungdanan. Sa pagkakaron, mikabat og 560 ka mga pamilya nga nag fill-up sa Pledge Card. Nakatigom na og Php 82,000.00 pasiuna sa GKK Trust Fund alang sa Seminary.

Matod pa ni Fr. Orlando Angelia sa iyang homiliya, ang St. Francis Xavier College Seminary nahimutang sa Catalunan Grande, Davao City. Kini gisugdan sa mga PME Fathers sa tuig 1956. Sulod sa 62 ka tuig ang eskwelahan alang sa umaabot nga kaparian sa atong Archdiocese nagkaguba na, daan na usab ang mga kagamitan. Seminary, the Heart of the Diocese and the training ground of young future priests.

Busa, nanginahanglan kini sa inyong tabang, unta ang matag pamilya, makasaad sa tag 50.00 pesos matag tuig, gamay nga kantidad, basta ang importante dili magbagolbol, anaa ang espiritu sa pagkamanggihatagon nga kasingkasing. Uban sa tinguha nga pinaagi niini, maka-abli sa hunahuna nga ang misyon sa matag binunyagan labi na diha sa pamilya matisok ang liso sa bokasyon sa pagkapari ngadto sa mga anak. Anaa ang diwa sa pagkamanggihatagon, makaambit sa kinaiyang Diosnon.

Ang laraw sa Dios, ang pamilya maoy natural nga sinugdanan sa relihiyosong bokasyon, tungod kay siya ang Simbahan, tungod kay siya ang Simbahn diha sa Pamilya. Diin dinhi mahimugso ang bokasyon sa pagkapari ug malipayon dawaton ang maong gasa gikan sa Ginoo.

Alang kang Ruben Omania ang PSKB sa GKK San Jose 2, nga nagkanayon, maski unsa pa ka gamay ang imong ikahatag basta kinasingkasing kini makabaton kag kalipay.

Gitugot ni Fr. Bong Dublan nga ang tanang second collection sa pito ka Misa alang sa Seminary ug mitunol usab siyang one hundred thousand gikan sa Parish Fund ug ang mga PSKB mihalad og upat ka sakong bugas.

Tungod niini, hilabihan ang pagpasalamat ni Fr. Orly Angelia. (Amie Desquitado | SJWP SoCCom)