Kabataan sa St. John Paul II Sub-Parish nagkahiusa nga nag-ampo sa Santos nga Rosaryo

Nagkahiusa ang mga kabataan nga nahisakop sa parokya sa St. John Paul II Sub-Parish, Inawayan, Santa Cruz, Davao del Sur sa pag-ampo sa Santos nga Rosaryo isip pakigduyog sa kalihukan sa simbahan diha sa “One Million Children Praying the Rosary Campaign, One-Million-Peso Shared Solidarity”. Ang hiniusang pag-ampo gihimo niadtong Oktubre 18, 2018 sa alas 9 ang takna sa kabuntagon nga gisalmutan sa nagkadaiyang elementarya nga tulunghaan sa Lunsod, ilabina ang gikan sa Baracatan, Inawayan, Darong, Almendras, Astorga, Rizal ug Madre Maria Pia Notari School.

Ang maong kalihukan gipangunahan sa mga katekista, magtutudlo, lumilihok sa simbahan ug mga boluntaryong ginikanan nga naggahin ug panahon sa pagsalmot ug pagpahimutang sa aktibidad.

Sulod sa usa ka oras, gihalad sa mga kabataan ngadto sa Dios ang ilang mga pag-ampo lakip na ang kahiusahan ug kalinaw sa nasod ug sa tibuok kalibutan ingon man ang kahupayan sa mga kabataang nag-antos sa Middle East ug Africa.

Tumong sa aktibidad nga makatigum ug usa ka Milyon ka Pesos isip hinabang sa mga kabataan ngadto sa simbahan, diin naghalad ang matag-usa og piso.

Gilakipan sab nila kini sa pagsulat sa ilahang ngalan sa Friendship and Solidarity Form. Subay sa gihatag nga Lagda ni Anatalia Remulta mao ang Pangulo sa mga Katekista sa Sub-Parish, kini mao ang ikaduhang higayon nga ang tibuok parokya sa Diocese sa Digos nisalmot sa maong kalihukan diin mas nahimong makabuluhanon niining tuig tungod sa paghalad ug piso alang sa katuyuan sa simbahan.

Sumala sa sulat gikan sa Aid to the Church in Need (ACN) International, ang maong katuyuan nagsugod pa niadtong tuig 2005 sa nasud Venezuela diin gisugdan kini sa usa ka gamayng pundok sa mga ginikanan ug kabataan nga nag-ampo sa rosaryo.

Nahimo nilang Lamdag ang pulong ni Santo Padre Pio, “If a million children pray the Rosary together, then the world will change.”

Nahisgutan usab sa maong sulat ang dakong gugma sa Dios diha sa mga kabataan ug ang panabang sa mahal nga Birhen Maria diha sa atong mga pag-ampo. Samtang ang Dyosesis sa Digos nag-awhag sa tanan nga ang maong kalihokan sa simbahan pagahimuon na sa matag tuig ilabina sa Oktubre atul sa buwan sa Santos nga Rosaryo.

Gitapos sa mga kabataan ang maong kalihukan pinaagi sa paghalad sa ilahang kinasingkasing nga paghalad og mahigugmaong pankanta sa “O Maria Reyna sa Pilipinas”.

Nanghinaot usab ang matag usa sa makanunayong pag-ampo sa mahal nga rosaryo alang sa pagpatunhay sa kalinaw ug kahiusahan uban sa tabang sa Mahal nga Birheng Maria. (Glen Miculob)