Fluvial Procession sa Our Lady of Fatima

Gatusan ka mga deboto sa Our Lady of Fatima ang mihangop sa Fluvial Procession nga gipahigayon sa Sta. Ana Wharf ning siyudad sa Davao alang sa pagsaulog sa ika-66 nga kapistahan sa Mahal na Birhen sa Fatima.

Mao kini ang ikaduhang higayon nga mipadangat og Fluvial Procession ang mga deboto isip kabahin sa pagsaulog sa kapistahan sa Mahal nga Birhen.

Gisugdan kini sa miaging tuig isip lakang nga gihimo sa mga kadagkoan sa simbahan aron sa pagpaduol sa Mahal nga Birhen sa katawhan nga mas malig-on pa ang pagtuo ngadto sa kahitas-an.

Nagkadaiyang sakyanan sa kadagatan, pribado ug pasaheroan ang mikuyog sa Imahe sa Mahal na Birhen sa Fatima. Mas daghan kini kon itandi sa miaging tuig nga mga partisipante ug milungtad sa kapin usa ka oras ang fluvial procession.

Sa samang pagkaagi, hugot nga seguridad ang gipatuman diin adunay mga Coast Guards nga mi-alirong sa nagkalain-laing sakyanan sa kadagatan aron sa pagsiguro sa kaluwasan sa tanan.

Gisugat usab sa bagang-duot sa mga deboto ang Mahal nga Birhen human sa Fluvial Procession ug gihatud pinaagi sa Land Procession padulong sa simbahan sa Our Lady of Fatima Parish diin gipahigayon ang katapusang novena sulod sa Santos nga Misa. (Novie Ramos)