Ang Gagmay’ng Kristohanong Katilingban sa the Our Lady of the Holy Rosary

Sa pangama sa among mahal nga Patron Birhen Maria, The Our Lady Of The Holy Rosary mapasalamaton, mabungahon, malipayon, ug malinawon ang among pagsaulog sa ika-23 nga kapistahan niadtong Octobre 20, 2018. Sa Santos nga Misa sa 07:30 sa buntag, nga mao ang highlight sa selebrasyon, nalamdagan ang katilingban sa mensahe sa among Kura Paroko, Rev. Fr. Leonie H. Espana uban ang dugang pagpasabot nga ang Fiesta mao ang oportunidad nga makapasalamat sa grasya sa matag tuig nga abot ngadto sa Labawng Makagagahom nga maoy tuburan sa tanang mga panalanging pinansyal, maayong panglawas ug kusog.

Sa panahon sa Novena, madasigon ang mga GSLs uban ang mga miyembro sa paghalad ug mga pag-ampo, ug mga preskong bulak uban ang hugot nga pagtoo nga si Birhen Maria mao ang kanunay nga nag-intercede nga kami mapanalipdan sa mga katalagman. Nga bisan sa panahon nga kusog ang ulan, lakip na ang mga kabataan ug ang mga kasikbit nga katingban wala gihapon nawad-an ug kadasig sa pagtambong sa maong kalihokan.

Ang GKK nahimotang sa Phase 3 Kadayawan Homes Bangkal, usa sa mga 25 nga GKKs sa Parokya sa Our Lady of Lourdes. Natukod kini niadtong Septyembre 1995 nga niadtong panahona sakop pa sa San Pablo Parish, diin ang ground breaking ceremony gi-officiate ni Rev. Fr. Dionisio Tabiliran. Gikan sa pagtukod sa katilingban, aduna nay lima ka ninglabay nga PSKs; Nitz Bonjoc, Leling Florita, Roger Balanza, Alice Lancian, ug Concesa Lagare. Ikaunom ang kasamtangang PSK nga si Leonora Jumento nga usa ka deboto ni Maria nga mao ang nag-donate sa statue sa among patron. Pinaagi sa maayong pagdala sa mga ninglabay ug kasamtangang PSK uban sa mga GSLs ug mga miyembro ang gamay nga kapilya sa una na-improve ang floor area ug structure lakip na ang facade nga nahimong presentable sa mga bisita ug labaw sa tanan ma-glorify ang among patron.

Tungod sa iyang strategic location, ang among kapilya ang usa sa mga nahimong venue sa mga gipahigayon nga seminars sa mga GSLs ug uban pang mga lideres sa parokya, ug ang nahimong opisyal nga venue sa binulan nga pormasyon sa mga PSLs sa wala pa natukod ang pastoral building sa parokya. Sa kasamtangan ang GKK gipanalanginan ug 7 PSL nga gipangulohan ni Rene Mondreza, 5 PSP nga gipangulohan ni Arlene Villaceran, 1 PSA Ofelia Bautista, 3 SoCCom nga gipangulohan ni Merlyn Resula, 2 Finance nga gipangulohan ni Lorie Mondreza ug 6 ka Tigpasayon sa Pundok Banay. Pinaagi sa SoCCom padayon ang pag-update sa GKK Registry Book uban sa tabang sa mga Tigpasayon sa Pundok Banay nga maoy nagkuha ug mga datos gikan sa mga miyembro.

Ang katilingban nakaangkon ug mga kalamidad sama sa mga pagbaha apan dili kini nahimong babag sa pagpangalagad, hinoon anaa ang kadasig sa pag-discharge sa gitahas nga misyon, ug ang hugot nga pag-ampo sa atong Labaw’ng Makagagahom pinaagi sa among nga patron. (Merlyn J. Resula | OLLP SoCCom)