OMPH gets ready for Advent

Nagkatapok ang mga Pangulo sa Katilingban (PSK) ug Social Communication Committee (SocCom) niadtong November 4, 2018 gikan alas nuebe (9:00) sa buntag hangtod alas dose (12:00) sa udto aron mahibaloan na ang mga sponsoring schedules alang sa Misa de Gallo nga magsugod sa December 16, 2018 ug Advent Reflection schedules alang sa thirty one (31) ka Gagmay’ng Kristohanong Katilingban (GKK) nga sakop sa Our Mother of Perpetual Help parish. Naapil na usab ug hisgot ang mga tasking alang sa parish-wide Christmas Party sa December 16, 2018.

Ang mga youth ang unang sponsor sa December 16, nga Misa de Gallo sa alas kuwatro y medya (4:30) sa kadlawon. Dayon ang pito (7) ka sona na sa mga mosunod nga kadlawon unya pagka December 24 ang grupo na sa Lay Organization Movements & Associations (LOMAS). Aduna dayon Misa sa alas otso (8:00) ug alas dies (10:00) sa gabii sa December 24 diin ang mga sponsors ang Parish Pastoral Council (PPC) ug Redemptorist Commmunity-CSsR. Pagka December 25 magsugod ang mga Misa sa alas siete y medya (7:30) sa buntag hangtod na sa alas sais (6:00) sa hapon. Padayon usab ang upat (4) ka kadlawon nga Misa de Gallo sa duha ka center area sa sona ang GKK sa Spring Valley ug GKK Sta. Cruz sa NHA Buhangin sa mga petsa nga December 16 ug 20 para sa Spring Valley unya December 18 ug 22 sa NHA Buhangin. Adunay center area nga gipili aron mas daghan ang makatambong sa mga Misa de Gallo tungod kay duol lang sa mga panimalay sa mga miembro apil mga bata ug tigulang makatambong na kay dili na pud kinahanglang magbaktas ug kapuyon ug hulat ug sakyanan.

Pero sa dili pa ang Misa de Gallo sa December 16 mauna ang Advent Reflection isip mas unang pagpangandam sa pagsaulog sa pasko. Sugdan ang Reflection sa December 1 dayon December 8 ug 15. Itunong ang reflection matag Sabado sa panahon sa Kasaulogan sa Pulong (KSP) pero sugdan lang ug alas siete y medya (7:30) sa gabii para mas taas ang panahon sa pamalandong taman alas nuebe (9:00) sa gabii. Naka-schedule kada sona na ang siyam (9) ka grupo sa mga OMPH Parish Team formators nga maoy mohatag sa maong Advent Reflection.

Magsugod na pud ug pangita ug praktis ang mga nagkadaiyang Ministries alang sa ilang Christmas Party presentations nga puwedeng kanta, sayaw, drama (KASADRA) sayaw lang o kanta nga bahin sa Pasko. Sugod na sad ug tigom kay aduna may change gift nga tag One Hundred Pesos (P100.00) pero optional lang ni siya.

Excited na man sa mga madawat nga regalo gikan sa mga door prizes pero mas excited mangandam na pud ug mga kanta para sa advent ug maminaw sa mga pamalandong sa Advent Recollection ug Homily sa Misa de Gallo. Merry Christmas mga igsoon ko ni Kristo! (Marieta Comighud | OMPH SoCCom)