Mga GSL gi-aghat: Kabatan-onan alimahon ug hatagan og luna sa GKK

Usa ka dakong kalipay ang gibati ni Arsobispo Romulo G. Valles, D.D. nga nagsud-ong sa dul-an 4,000 nga gidaghanon sa mga mitambong nga mga GKK Servant Leaders atol sa PSK/GSL Gathering sa Martin hall sa Ateneo de Davao University, Jacinto St., Davao City niadtong Sabado, Oktubre 27, 2018.

Nagpadala sa ilang tagsa tagsa ka Pangulo sa Katilingban kauban sa mga Tresorero, Social Communications parish coordinators, tagsa ka Tigpasayon sa Pundok Banay (TPB) ug kabatan-onan ang 1,800 ka mga GKK sa tibuok Archdiocese of Davao.

“it’s a sight ang kasinatian isip amahan sa Archdiocese, it’s giving me so much joy and pride,” si Abp. Valles nagkanyon, “It’s a fulfillment nga makita nga buhi ang GKK nga dakong damgo sa simbahan sa Pilipinas nga ang tanang mga diyosesis maglangkob sa GKK. Kamo ang ebidensiya nga buhi ang GKK sa Archdiocese of Davao.”

Labaw na gayud ang iyang kalipay sa dihang gi-presentar sa Ateneo de Davao University ang 450 ka mga estudyante sa Grade 8 kinsa gipa-ilawom sa programa nga mobalik ngadto sa ilang tagsa-tagsa ka mga GKK.

“Interesado ang Ateneo Grade 8 students sa youth ministry, ang iyang luna sa GKK isip kabahin sa mga sumusunod ni Kristo,” pahayag ni Abp. Valles atol sa homiliya sa Santos nga Misa isip pagtak-op sa maong panagtapok.

Unang nagpasundayag ang kabatan-onan nga sakop sa St. James Vicariate kabahin sa mga kasinatian sa youth ministry sa parokya diin gipakita ang ka-mahinungdanon sa home visitation ug paghugoy-hugoy tali sa mga batan-on sa ilang komunidad.

Sa gihimong pagpamulong sa mga lideres sa Davao Archdiocesan Youth Coordinating Apostolate (DAYCA), mi-apela sila sa pagsabot sa kabatan-onan kinsa kasagarang aktibo lamang panahon sa youth camp. Luyo niini, ilang gipasabot nga gikinahanglang suportahan ang ilang mga kalihukan sanglit dinhi usab nagagikan ang bokasyon sa pagkapari o pagka-madre.

Gisaysay ni Abp. Valles nga gihimo usab ang Synod of Bishops on the Youth didto sa Vatican diin gihatagan ug higayon ang kabatan-onan nga makapadayag sa ilang kaugalingon.

Samtang dinhi sa Pilipinas, nangandam usab ang simbahan alang sa kasaulogan sa Tuig sa Kabatan-onan nga pagabuksan sa umaabot nga Disyembre 2, 2018 isip kabahin sa siyam ka tuig nga pagpandandam alang sa ika-500 ka tuig nga kasumaran sa pag-abot sa Kristiyanismo sa tuig 2021. Subay niini pagahimoon usab ang National Youth Day sa Cebu City sa 2019.

“It’s a matter of the life of the church nga hatagan ug pagtagad ang kabatan-onan,” si Abp. Valles midugang. “Gipukaw kita nga ‘very vital, extremely necessary, non-negotiable’ nga ang pag-uswag, pag-atiman ug paghatag ug luna sa kabatan-onan sa Simbahan. Hinay-hinay lang training sa kabatan-onan nga maoy mopuli ugma damlag.”

Busa tungod niini gisukna sa arsobispo ang mga mitambong nga mga GSL kung hatagan ba ug luna ug pagadawaton nila ang mga kabatan-onan sa GKK. “Unta welcoming ta nga naghatag ug bili ug kinsa ang kabatan-onan,” siya midugang.

Dugang pa niya nga isip mga GSL, gihatag sa mga apostoles ang mga gasa sa Ginoo ngadto sa mga lideres sa GKK kansang tuyo niini mao nga gihatagan ug higayon nga makasilbi aron sa pagpalambo ug pag-ugmad sa katilingban ug sa pagdala sa katawhan ngadto sa kinabuhing walay katapusan.

Iyang gisaysay ang nasaksihan sa Estados Unidos diin nag-atubang ug dakong suliran ang simbahan sanglit wala nay mga kabatan-onan bunga sa desisyon sa kasagaran sa mga magtiayon nga dili manganak. Busa gipahimangnoan usab ni Abp. Valles ang mga servant leaders ilabi na ang apostolado sa Family and Life sa pagpalambo gayud sa pamilya alang sa sumusunod nga mga henerasyon.