Ang Kasal Balaan

Sila usa ka pamilyang Muslim nga nakiglambigit sa mga kalihukan diha sa among Gagmay’ng Kristohanong Katilingban.

Ang kinasal nga tawagon lang nato ug Jordan ug Jean nagpuyo sila ug usa na katuig kapin, isip magtiayon nga wala makasal, gihandum nila nga unta mahiusa na sila, ug niabot gayud ang ilang mga tinguha niadtong Octobre 20, 2018, gikasal sila sa usa ka Muslim nga rito, gi bendisyonan sa usa ka Imam. Sa mga igsoon natong Muslim, ang kasal usa ka seremonya nga gihatagan ug dakong bili, nga ang lalaki ug babae lang ang gitugutan niini, ug ang kasal pagahimoon sa publiko ug dili himoong sekreto, uban sa ilang mga ginikanan ug kaigsoonang Muslim ug Kristiyanos.

Bisan unsa pa man ang atong relihiyon, kung ang nagpuyo nianang usa ka panimalay gihiusa sa Dios diha sa Sakramento sa Kasal, kini magpuyo nga malipayun. Luyo sa mga pagsulay sa kinabuhi, mga kasakit, lalis, kawad-on, ug tentasyon, kung ang Ginoo ang sentro diha sa atong pagkinabuhi, dili gayud kini mabulag. Hinoon, kini nga mga pagsulay ang makapalig-on kanato. (Rosalinda C Jabonillo | SPC SoCCom)