Diocese sa Digos kulang sa pari, Obispo nagdasig sa kabataan alang sa bokasyon

Mismong ang Obispo sa Diocese sa Digos nga si Bishop Guilermo Afable, DD ang nag-awhag sa mga kabataan alang sa pagtubag sa tawag sa bokasyon, atol sa pagdawat sa 82 ka kabataan sa sacramento sa kompirmasyon niadtong Oct. 20, 2018 sa GKK San Isidro Labrador, Barangay Manga, Matanao, Davao del Sur.

Sumala sa Obispo nga ang anak sa Dios maalagaron, ingon man mismo ang simbahan, busa siya nagdasig sa mga kabataan nga gikan sa Zona uno ug dos ilalom sa San Vicente Ferrer Parish sa Barangay Bangkal sa pagtubag sa bokasyon, sumala sa Obispo nga kung nadungog nila ang tawag dili sila magduha-duha sa pagtubag ug mamahimong moduol sa kura paroko nga si Rev. Fr. Allan Joie Nunez aron magpalista, ilabina nga ang deadline sa pagdawat sa aplikante nga mosulod sa seminaryo, karong umaabot nga Nov. 4, 2018, particularmente na ang anaa na karon sa Grade 10, Grade 12, College graduate bisan man college undergraduate.

Sumala sa Obispo nga sama kaniya, siya nagadasig sa tanan sa gusto motubag sa pagkapari ingon man ngadto na sa mga relihiyoso nga kinabuhi.

“Mao usab kini sa mga kababaihan, mamahimo kamo nga magtubag sa tawag sa Ginoo, pinaagi sa pagkamadre, ayaw kamo kabalaka sa pagtubag, sama kanako nga gitahan ang kaugalingon alang sa pagserbisyo sa simbahan,” butyag sa Obispo.

Samtang ang maong pag-awhag sa Obispo nahitabo usab didto sa ika-upat nga kapistahan sa St. John Paul II Sub-parish sa Santa Cruz Davao del Sur niadtong Oct. 22, 2018. Kansang midugang ang Obispo sa pag-awhag ingon man pag-angkon nga adunay kakulangan sa kasamtangan sa mga pari sa Diocese, gani ang Our Lady of Mount Apo Parish sa Kapatagan, Digos City, Davao del Sur wala nay kura paroko, ang mga naga-atiman sa pagkakaron mao ang mga kaparian nga anaa na destino sa Mary Mediatrix Cathedral.

“Adunay upat ka pari nga masakiton karon sa Diocese, dili na malauman, di na makatabang sa gimbuluhaton, samtang adunay nagbarog atong pangandaman kung adunay mohalin sa laing kalibutan, adunay nagpaabot nga mohulip kanila,” dugang pagpasabut sa Obispo.