Suporta alang sa bokasyon sa pagkapari gi-aghat

Gi-aghat karon sa Arsobispo sa Dabaw ang mga mitambong sa misa atol sa ika-7 nga kapistahan sa San Juan Pablo Dos sa parokya sa Tugbok nga suportahan ang bokasyon sa pagkapari.

Atol sa iyang homiliya niadtong Oktubre 22, gisaysay ni Arsobispo Romulo Valles ang iyang mga kalihukan sa milabay nga mga semana didto sa gawas sa nasud.

Sa imbitasyon sa Obispo sa Pennsylvania nakahigayon si Arsobispo Valles sa pagbisita sa maong Dayosis ug sa mga Pilipinong kaparian kinsa nag-misyon didtong dapita ug ingon man sa pagsaulog sa Santos nga Misa sa makaduha ka higayon.

Dako ang iyang kahingawa nga nasud-ong sa mga katawhan kinsa mitambong sa alas 9 sa buntag nga misa atol sa adlaw nga ting-trabaho ilabi na sa presensiya sa mga kabataan sanglit didto sa simbahan sa Amerika, gikabalak-an sa simbahan kung kinsa ang mga mosunod kanila sanglit wala nay kabatan-onan.

“Kay dunay mga couple nga (nag-ingon) nga we have decided not to have children…children are gifts… first and foremost gifts of life,” sumpay ni Valles.

Busa siya midugang nga mahinungdanon nga ipadayon ang testimonya sa pagtoo nga ipadayon ug palig-onon sama sa pagsuporta sa bokasyon sa pagkapari, butang nga ikalipay gayud ni Santo Papa Juan Pablo Dos, ang patron sa maong parokya.

Iya usab nga gibutyag nga gi-tanyag sa Obispo Pennsylvania nga ihatag ngadto sa Arkidayosis sa Dabaw ang halad sa duha ka mga misa nga gipanguluhan ni Arsobispo Valles ug kini itagana usab niya alang sa St. Francis Xavier College Seminary alang sa paglahutay sa bokasyon sa pagkapari.

“Alang sa atong local nga simbahan sa Dabaw, uban sa atong patron nga si Saint Pope John Paul II… sa inyong consciousness… apil kamo nianang responsibilidad sa pag-atiman sa future priests,” si Valles nagkanayon.

Base sa basahon niadtong adlawa, midugang si Valles nga kung siya ang pasulaton, iyang isumpay nga kung naghupot siya ug dakong bahandi sama sa datu sa ebanghelyo, magtukod siya ug dakong kamalig aron nga dapiton ang mga katawhan sa pagkuha sa ilang mga panginahanglanon. Siya nanghinaut nga susama usab ka pagkamanggihatagon ang katawhan alang ngadto sa mga nanginahanglan.

Sulod usab sa maog misa, nasaksihan usab sa mga mitambong ang pormal nga instalasyon isip bag-ong kura paroko ni Msgr. Martiniano Gorgonio kinsa nangayo sa panabang ug suporta sa mga GKK Servant Leaders sa 25 ka mga GKK, sa mga sakop sa Parish Pastoral Council ug ingon man sa iyang parish staff.

Natukod ang simbahan sa Tugbok niadtong tuig dos mil onse human nga nadawat ang donasyon sa usa ka ektaryang luna nga gipanag-iyahan sa pamilyang Relampagos.