Larawan ni Cristo ang Matag Usa

Ika-31 nga Domingo sa Ordinaryong Panahon
Deuteronomio 6:2-6 / Hebreo 7:23-28 / Markos 12:28-34

Ang Dios nga Magbubuhat pinaagi sa pagkatawo ni Hesus, misulod sa kalibutan uban sa iyang mga binuhat, aron mamahimong usa kanato. Iyang gipakita kanato nga wala’y pagka-bahinbahin tali sa paghigugma sa Dios ug paghigugma sa isigkatawo. Ang paghigugma sa Dios ikapakita ngadto sa atong paghigugma sa atong isigkatawo. Unsa may gibuhat ni Jesus dinhi sa kalibutan? Daghan ang iyang nahimo ngadto sa katawhan nga atong matawag nga iyang isigkatawo. Sa iyang paghimo sa daghang mga buhat sa kalooy, pag-alim sa mga masakiton, pagtudlo sa katawhan nga naminaw kaniya, pagpakaon sa mga gigutom ug uban pa. Labaw sa tanan gihalad niya ang iyang kinabuhi ngadto sa Iyang Amahan, pinaagi sa pagkamasinugtanon. Gituman niya ang pagbuot sa iyang Amahan. Gidawat niya nga siya sakiton, mag-antus, ilansang sa krus, hangtud sa iyang kamatayon sa krus. Sa laing pagkasulti, gipakita ni Jesus sa buhat ang pagsunod sa sugo sa iyang Amahan.

Karong Domingoha, si Kristo nagpadayag nga kon nahibalo kita sa mga sugo sa Dios sama sa gisaysay sa nangutana kaniya, nga ang “paghigugma sa tibuok kasingkasing, sa tibuok hunahuna, sa tibuok kusog ug sa paghigugma sa atong isigkatawo, ug kini labing angayan kaysa mga sinunog nga mga halad”, ug mabuhat nato kini, dili kita halayo sa gingharian sa Dios.

Pagkaanindot sa saad sa Dios ngadto kang Moises diha sa unang pagbasa: nga kon sundon sa mga tawo ang Iyang mga sugo, mosanay og motunhay ang iyang kinabuhi tungod kay mabuhong sila sa kalan-on ug kalipay ning kalibutan. (Makabaton kamo’g taas nga kinabuhi). Sa laing bahin, si Jesus, miingon nga anaa na kanato ang gingharian sa Dios, kon mabansay ang mga sugo sa Dios. Tinuod daghan ang nakahibalo sa mga sugo sa Dios apan, naglisod pa gayud sa pagbansay niini. Ang kahibalo sa usa ka butang wala magpasabot nga mahimo na dayon kining buhaton, tungod kay usahay magpabilin lamang kining tanan sa atong alimpatakan, kon dili nato kini ipalawom, dawaton og paningkamutan nga bansayon. Busa dili tanang atong nahibaloan mahitungod kang Jesus ug sa iyang mga sugo segurado na nga atong gi-practice kini sa atong pang-adlaw-adlaw nga kinabuhi. Matud pa bitaw ni Papa Francisco, dili nato ikalipay ang atong mga nahibaloang mga pagtulun-an mahitungod sa Dios kon hangtud lamang kini sa atong hunahuna ug wala nato kini bansaya o buhata diha sa atong adlaw-adlaw nga kinabuhi.

Dali ba natong mabansay o masunod ang mga sugo sa Dios, ilabi na ang paghigugma sa atong isigkatawo? Gisaaran kita ni Jesus nga mahimo nato kini ilabi na sa iyang giingon karon sa ebanghelyo. Una sa tanan ilhon nato ang tanang tawo nga larawan ni Cristo. Busa miingon siya: “nga bisan unsa ang atong gihimo alang sa atong silingan gihimo usab nato ngadto kaniya, ug kon unsa man ang atong gitago, gikan sa atong silingan, gitago usab nato ngadto kaniya.” Pinaagi usab sa panabang sa Espiritu Santo nga sa kanunay nagatabang sa matag usa, aron mabuhat nato ang angayang buhaton sa pagsunod sa mga sugo sa Dios. Hinaut nga sa kanunay hangyoon nato ang Ginoo sa kaalam nga makahibalo sa mga sugo ug kaikag nga mabansay kini. Asa na man kita karon sa atong pagsunod sa mga sugo sa Dios?