Siya nga maninguha makakab-ot uban sa grasya

Ika-30 nga Domingo sa Ordinaryong Panahon
Jer. 31:7-9 / Sal. 126 / Heb. 5:1-6 / Mk. 10:46-52

Sa milabay nga mga Domingo, namalandong kita sa mga tinun-an ni Hesus nga naninguha mosunod ug mouban kaniya. Dihay dato nga nasubo sa hagit ni Kristo sa paghatag sa iyang kabtangan ngadto sa mga kabos. Dihay mga tinun-an nga gipamatngon ni Hesus sa ilang sayop nga tinguha sa posisyon human sila moalagad kaniya. Kini pipila lamang sa kamatuoran nga daghang babag ang paghimamat ug pakig-uban sa Ginoo. Apan ang tawong maninguha pagsunod ug pagpakig-uban sa Ginoo makakab-ot niini uban sa grasya.

Karong Domingoha, una nga babag ang pagkabuta. Dili siya makakita ug tungod niini limitado ang iyang paglihok. Dako kining babag sa pagsunod ug paghimamat kang Kristo. Apan giayo kini ni Hesus sa wala pa siya mosulod sa Jerusalem. Uban sa grasya nahimamat niya ang Ginoo tungod kay dili man siya bungol. Makadungog man siya ug maantigo siya nga maminaw. Kita kaha molihok ba kita human kita makadungog sa mensahe sa Ginoo aron moduol kaniya? Human nga ikaw dunay naamguhan, mihimo ka ba og aksiyon aron ang imong pangandoy matuman?

Ikaduha nga babag mao ang pagkawalay suporta sa mga tawo. Gani, gipahilom nila siya ug gisanta. Alang sa mga tawo dili siya angay ug wala siya’y katakus nga duolon ni Hesus. Apan uban sa grasya, siya hinuon ang giduol ni Hesus. Ang iyang paninguha nga makakita kang Hesus gitubag sa Ginoo pinaagi sa pagduol mismo sa Ginoo kaniya. Gipangutana pa hinuon siya sa Ginoo kon unsay buot niyang buhaton sa Ginoo alang kaniya. Nakaamgo ba kita nga sa panahon nga dili nato mahimo ang Ginoo maoy mohimo niini alang kanato? Nisangpit ka ba sa Ginoo sa panahon nga daw wala mo mabati ang suporta sa uban?

Sa pagkatinuod, ang Ginoo mismo maoy unang naninguha nga kita iyang makauban. Kini maoy iyang gipalanog pinaagi ni Propeta Jeremias sa unang pagbasa. Iyang hiusahon ang katawhan, pakit-on ang mga buta, palakwon ang mga bakol ug lipayon ang tanan. Mao nga siya, matod pa sa ikaduhang pagbasa, naghalad og sakripisyo alang sa atong mga sala. Kining maong dungod nga gihatag kaniya sa Amahan, iyaha usab nga gasa kanato. Busa, paninguha uban sa grasya sa pagsunod, paghimamat ug pagpakig-uban sa Ginoo kini imong makab-ot uban sa grasya.