San Francisco: Konkretong sumbanan sa pagpalambo sa pagtuo ug pagsunod sa Ginoo

“Magpasalamat sa Diyos sa tanang grasya nga Iyang gihatag kanato, materyal – importante kaayo na, apan labaw sa tanan, ang pagpalambo sa espirituhanon nga kinabuhi.”

Mao kini ang gisaysay sa auxilliary bishop sa Davao – Bishop George Rimando atol sa iyang homiliya isip mass presider sa ika-19 ka tuig nga kapistahan sa parokya sa San Francisco de Asis – Tagakpan niadtong Oktubre 4. Ang maong misa giduyugan usab sa mga kaparian gikan sa Oblates of St. Joseph og pipila usab ka mga Diocesan priests nga naggikan pa sa nagkadaiyang lugar sa nasod. Anaa usab sa maong santos nga misa ang kura paroko – Rev. Fr. Peter Fancubila, OSJ og Rev. Fr. Jolito Marterior, OSJ, associate priest.

Dugang pa sa auxilliary bishop, sa panghitabo sa kinabuhi ni San Francisco, ang pagsunod sa Ginoo dili hayahay, anaa usab ang mga pagsulay, apan nakahatag kini kaniya ug dugang kusog sa pagpadayon sa paghalad sa iyang kaugalingon. Sa paghatag niya ug bili sa mga mananap ug tanom, nakita niya ang hulagway ug presensiya sa Dios ug ang presensiya sa Diyos sa katawhan. Matud niya, ang pagtan-aw sa tao sa iyang palibot ug sa iyang palibot makita ang mata sa kalooy sa Ginoo.

Nagpahimangno usab siya nga kung anaa man ang kurso sa pagsulod sa bokasyon sa pagka-pari ug pagka-madre, dili kini angay babagan sa ginikanan o ni maskin kinsa man, kon dili, dapat kini nga suportahan. Kung wala pud ang kurso sa pagsulod sa maong bokasyon, dili sab kini angay nga ipamugos.

Mapasalamaton usab ang kura paroko sa maong parokya nga si Rev. Fr. Peter Fancubila, OSJ sa katawhan sa kalampusan sa tanang aktibidades linya sa maong kapistahan. Nagpasalamat usab siya sa auxilliary bishop sa pagbisita og pagkamaayo niini dili lang sa iyaha, kon dili apil usab sa uban pang mga kaparian.

Usa pa sa pagsaulog sa adlaw sa kapistahan, gipahigayon usab sa parokya ang Modern Dance Contest, Singing Contest ug koronasyon sa Mr. and Ms. SFDA 2018 nga gikalimbigitan sa 26 ka mga kandidata gikan sa nagkadaiyang GKK nga nahisakop sa maong parokya. Anaa usab ang siyam ka adlaw nga pag-novena, Santos nga Misa ug prusisyon. (Rizzel Mae C. Daya | SFDA SoCCom)