Susiha ang motibo sa imong pagsunod kang Kristo

Ika-29 nga Domingo sa Ordinaryong Panahon
Is. 53:10-11 / Sal. 33 / Heb. 4:14-16 / Mk. 10:35-45

Unsa ba gayod ang motibo ug tumong sa imong pagpangalagad? Unsa ba gayod ang tuyo nimo kung ikaw motabang sa uban ug mobuhat sa maayo? Nasayod ka ba unsay imong gipangayo sa Ginoo?

Sa pagpangalagad pinaagi sa pagsunod kang Kristo, gihasol sa pagsulay ang mga tinun-an. Gisukod unsa katiunay ang ilang hugot nga desisyon sa pag-alagad sa Dios ug sa katawhan. Gibadlong ni Hesus ilang sayop nga panglantaw mahitungod sa pag-alagad.

Usa ka dakong temtasyon ang motibo sa pagpangalagad nga mahimo kitang gamhanan. Kini gisimbolo sa gipangayo nga paglingkod sa trono. Sa higayon nga kita mosulod sa pag-alagad, sama sa nadungog nato sa unang pagbasa, ang alagad moantus alang sa uban. Ang tinuod nga alagad mopas-an sa kabug-at sa uban ug dili ang kaugalingon nga kahayahay ang gihuna-huna. Ang alagad mosunod sa nagtudlo ug nagpili kaniya ug dili magbuot-buot sa kaugalingon. Unsay makaayo ug makalipay sa isigkatawo mao ang pagkaon ug kinabuhi sa tinuod nga alagad. Siya andam mosunod ug dili lamang magmando.

Laing temtasyon nga motibo sa pagpangalagad ang paghunahuna nga baslan ang atong serbisyo. Sa ikaduhang pagbasa, kanunay nga mobati alang sa uban ang tiunay nga pari. Siya makigduyog sa tanang panahon, bisan sa kahuyang ug kasakit. Nasayod siya nga siya nakadawat lamang sa grasya sa kalooy mao nga siya usab kanunay nagpuyo sa maong kalooy. Dili sukli o bayad ang motibo sa pag-alagad kondili ang paghatag sa kaugalingon. Kalipay sa alagad nga siya makahatag ug dili lamang nga modawat.

Ato karong susihon kung nagpabilin ba kanato ang maong tinguha sa tinuod nga pag-alagad. Buhion nato sa makausa pa ang kaikag sa pagsalmot sa misyon ni Kristo sa pagpakaylap sa gugma sa Dios ug dili pag-angkon sa atong personal nga katagbawan. Wala pa ug wala na gayoy tawo sa kasaysayan sa kaibotan nga makalabaw sa pagkamanggihuna-hunaon sa uban gawas kang Kristo.