Soccom, mga mensahero ni San Miguel sa Panacan

Positibo, aktibo ug malipayon nga mga personalidad, mao kana ang unang makita sa mga mensahero ni San Miguel sa Panacan. Angayan gayud sila sa ilang katungdanan nga maoy gipyalan sa paghatag ug maayong balita ug impormasyon sa sulod ug sa gawas sa parokya. Dungan sa kapistahan ang Soccom San Miguel Parish Panacan nagtapok alang sa daghan nga katuyuan, dili lamang sa pagkuha sa balita apan sa paghatag ug pahalipay sa mga parokyano ni San Miguel sa adlaw sa kapistahan.

Septiyembre 29, 2018 ang grupo miapil sa Misa ug pagkahuman nagtapok kini aron sa hiniusa nga paniudto kauban ang mga bisita nga parokyano.

Pagkahuman sa Fellowship lunch gisugdan dayon ang ilang programa nga mao ang paghatag sa libreng ice cream, libreng tambal, libreng blood pressure check-up, ug ang launching sa Soccom Charity.

Bisan sa kadaghan sa mga tao nga naglinya, apan wala kini nakahurot sa giandam nga pa ice cream sa Soccom.

Miapil usab ug linya ang Kura Paroko nga si Fr. Edsel Paloma bisan sa kataas ug kainit sa linya aron sa libre nga ice cream. Daghan nalipay ug nakadayeg sa gihimong programa sa Social Communication Team sa San Miguel Parish Panacan tungod sa kaabtik sa grupo.

Mapasalamaton ang tanan miembro sa maong team sa way sukod nga pagtinabangay sa mga kalihukan. Tanan gayud adunay partisipasyon sa kapistahan ni Senyor San Miguel.

Gibati ug kalipay ang Soccom Coordinator tungod kay adunay mga inactive secretaries ug treasurers nga miduol kaniya ug nag presentar sa ilang kaugalingon nga gusto nila muapil sa grupo tungod kay nakita nila ang kanindot sa mga programa niini. Human sa kalihukan nagplano na usab ang team coordinator sa mas nindot nga sunod programa sa Soccom. Nagpadayag og dakong kalipay si Liz Gilbuena sa gipakita nga suporta sa iyang grupo ug ingon man sa mga individual nga mitabang ug mihatag sa ilang suporta alang sa kalihukan sa organisasyon ug nanghinaut sa makanunayong panaghiusa sa grupo, sa ngalan sa tinud-anay nga paghalad ug kinasing-kasing nga serbisyo alang sa katawhan sa Panacan. (Maria Leizl Gilbuena | SMP SoCCom)