Tugawa Kami Ginoo

(A Reflection from Fr. Bong Lunas STL, St. Joseph Parish, Sta. Cruz)

Si anhing Obispo Bienvenido Tudtod adunay pag-ampo nga nagkanayon:

“Tugawa kami Ginoo sa higayon nga nakontento na kami sa among kaugalingon; ang among mga damgo dali ra nga matuman ug ang among paglantaw hamubo ug kulang. Sa panahon nga tan-aw namo sa kinabuhi sayon ra ug walay mga babag tungod kay gipili namo ang paglawig diha ra lapyahan.”

Kon ang mga tawo magiyahan niining maong kinaadman, mabatunan niya ang kalinaw alang sa tanan. Kay ang nag unang hinungdan sa kagubot mao ang kahakog nga magdala sa mga tawo ngadto sa kasina, ug unya ang panag-away ug kagubot kay ang mga tawo hakog, nag daug-daug sa uban, inay mo-alagad sa matag usa. Maoy giapas nila ang mauna ug dili ang maulahi sumala sa sugyot sa Ginoo.

Si Obispo Ben Tudtod mipadayon sa pag-ingon:

“Tugawa kami Ginoo, sa panahon sa kabuhong sa mga butang kalibutanon ang among naangkon ug nalimot na kami sa pagka-uhaw sa Tubig sa Kinabuhi. Tungod kay gipakabililhon namo ang pagpuyo niining kalibutana, ug mihunong na kami sa pagpangandoy sa eternidad ug maningkamot sa pagtukod sa Bag-ong yuta.”