Ikalipay ang kalipay sa uban

Ika-26 nga Dominggo sa Ordinaryong Panahon
Num. 11:25-29 / Sal. 19:8, 10, 12-13, 14 / San. 5:1-6 / Mk. 9:38-43, 45, 47-48

Apas sumpay sa pamalandong sa mga pagbasa sa miaging Dominggo, padayon kita karon gipahimangnoan nga ang kasina peligro, labina gayod kon kini maghatod kanato sa kaluya tungod sa makita nato nga kalampusan ug panalangin nga naangkon sa uban. Hinonoa, mas maayo pa nga kita malipay sa kalipay sa uban.

Sa unang pagbasa, si Josue nga miagda kang Moises nga santaon sila Eldad ug Medad kinsa nagsulti sama sa mga propeta gibadlong ni Moises sa pag-ingon, “Nasina ka ba tungod ug alang kanako? Kaayo unta kon ibutang sa Ginoo ang iyang espiritu nganha sa iyang katawhan ug silang tanan mahimo nga mga propeta!” Sa ikaduhang pagbasa, mangahilak ang mga dato nga nagpaharuhay ug misilot ug mipatay sa tawong walay sala kinsa wala mosukol kanila bisan sila naghago ug nagtrabaho sa tinuoray.

Sa Ebanghelyo, wala gidid-an ni Hesus ang tawo nga naghingilin og mga yawa kay alang kaniya ang dili batok kanato dapig kanato. Gani midugang siya sa pagpahinumdom nga ihatag ang unsay makalipay sa uban, sama sa pagpainom sa giuhaw, paglikay sa pagpakasala pinaagi sa atong mga paggamit sa maayong paagi sa atong mga mata, kamot ug mga tiil.

Nganong makasala kita usahay gamit ang atong mga mata, kamot ug mga tiil tungod kay usahay dali tang makasaway sa atong makita o makahuna-huna og dili maayo sa atong makita. Usahay manghilabot usab kita gamit ang atong mga kamot sa pagkuha sa butang sa uban ug gamit ang mga tiil sa pagdagan human kita nakasala aron lamang malipay ang atong kaugalingon ug malupigan ang uban. Gahi kitang moangkon sa atong sayop bisan nayatakan ang katungod sa uban aron lamang matagbaw ang atong kahakog ug pagpaharuhay.

Apan sama sa atong pamalandong sa miaging Dominggo, walay kalinaw sa kahiladman sa tawo nga manlupig ug molabaw sa uban sa paaging dautan. Diha lamang sa pagpaubos, pagdawat, pagtabang ug pagmahal sa uban atong maangkon ang tinuod nga kalipay. Busa angay lamang nga ikalipay ta ang kalipay sa uban.