Ayaw kasina

Ikakawhaag-Lima nga Dominggo sa Ordinaryong Panahon
Kaalam 2:12 / Sal. 54:3-8 / San. 3:16-4:3 / Mk. 9:30-37

“Bisan pa’g modaug ka sa lumba sa mga ilaga, magpabilin ra gihapon ka nga ilaga.” Usa kini sa mga panultihon nga magpahimangno kanato nga walay kapadulngan ang kasina. Kapoy kaayo ang kinabuhi kung nagbantay lamang kita sa kalampusan sa uban ug masina kanila.

Mao kini ang nahitabo sa unang pagbasa diin ang maayong tawo kanunay gayod nga gipangitaan sa sayop aron dili siya makabalda sa mga plano sa naghimo og dautan. Sa ikaduhang pagbasa, gipahinumdoman kita nga panagbingkil ug pagkabahin-bahin lamang ang sangputanan sa kasina. Mao nga sa Ebanghelyo, gipinahan ni Hesus ang iyang mga tinun-an nga magmapaubsanon sama sa usa ka bata ug mag-alagad sa uban kay dili mohatud kanila sa kalinaw ug kalipay sa kahiladman ang pagpangandoy sa taas nga puwesto o posisyon.

Diha lamang sa tinuoray nga pag-alagad maangkon ang tinuod nga kalipay. Gani walay tawo nga magmalipayon ug magmalinawon kon ang iyang tuyo mao lamang ang pagpalabaw sa uban. Mas maayo pa nga maningkamot kita sa pagtabang nga moasenso ang uban aron nga maapil usab kita sa maong pag-uswag. Kung ania kanato ang mentalidad sa alimango nga magpunay ug bira paubos sa usa’g usa, mabungkag gayod ang atong katilingban. Diha lamang sa pagtinabangay ug pagsuportaay ug dili sa pagpataasay og ihi kita molambo. Kung nalipay ka nga milambo ang imong isigkatawo, dili ka layo sa pagkabalaan. Apan, kung maguol ka nga miasenso ang imong silingan, usisaha ug pamalandongi ngano nga masina ka man sa uban.

Paningkamutan ta nga magpabilin kitang mapaubsanon inay masinahon. Matod pa ni Santo Papa Francisco, “Tataw kaayo nga ang tawo nga puno sa kabalaka, mapahitas-on ug nanginahanglan nga toohan gayod sa uban dili masangko sa kabalaan. Gihagit kita sa pagpakita sa kaakuhan pinaagi sa paghatag og kahulogan sa Maayong Balita ug sa pagpaila kang Kristo diha sa atong kinabuhi.”

“Bisan pa’g modaug ka sa lumba sa mga ilaga, magpabilin ra gihapon ka nga ilaga.”