Sa kalipay man o kasakit praise the Lord my soul

Praise the Lord my soul! Ang responsorial psalm sa ika twenty-third Sunday in Ordinary Time nga Misa diin ang GKK Sta. Cruz sa NHA Buhangin ang sponsoring GKK sa alas 3:00 sa hapon nga Misa.

Smiling ang mga nagserve, gikan sa Introduction nga si Marieta Comighud, 1st Reading Lorna Diego ug 2nd reading Virginia Tampipi. Ang mga naghalad man usab nga gipangulohan sa among Pangulo sa Katilingban (PSK) Fe Jayectin malipayong nagbitbit sa ilang mga halad sa Misa.

“All is well” sa eninglish pa pero sa motoo mog sa dili nagmanifest lang gyud ang panalangin ni Lord sa tanan ilabina sa mga nagserve nianang adlawa. Dili mailhan no nga ang among PSK wala pa gani naka forty (40) days sa iyang bana nga iyang giatiman sa pagsugod pa lang sa iyang pagkasakit hangtod sa iyang kamatayon. Komedyante kaayo siya dili mahalata nga bug-at na diay iyang ginapas-an nga krus kay gipas-an niya kini nga nagsalig sa Dios ug aduna siyay GUGMA, gugmang way paglubad. Bisan mingaw pero makita pa gihapon nimo ang “inner peace” sa panghitabo. Sayod siya nga ang iyang bana anaa na sa walay katapusang kalipay kauban ang atong Ginoo.

Sa laing bahin si Lorna Diego ang among Pangulo sa Panudlo (PSP) poised kaayo ug smart mohatag sa iyang pagbasa dili mahalata nga aduna siyay bug-at nga gipamati sa lawas, nga aduna pa siya’y CT scan results nga nagkinahanglan pa ug mas klaro nga interpretasyon. Makatakod ang iyang gana sa pagdocument sa mga nanghitabo nianang adlawa. Kabalo na ta nga ang mass sponsoring sa parokya dili kada Dominggo nga event na mao documentation with a picture is a requirement. Maayo na lang naay matan-aw sa mata sa panahon nga magsugod na ta ug kalimot sa mga panghitabo sa atong kinabuhi.

Ang 2nd reading nga si Virginia Tampipi, among katekista, dili halata nga bag-o pa lang pod nga nakarecover sa iyang operation ug nga padayon pang gapanghadlok sa health condition sa iyang bana nga aduna usab sakit.

Ang Introduction ug Prayers of the Faithful (POF) nga reader – ako na! Dili ba pod mahalata nga gasakit ang kuto-kuto sa antibiotic nga iyang pito (7) ka adlaw ng giinom para mawala ang ubo, ug kalentura? Masaligon kong nag-ampo nga panahon sa pagbasa dili hutoyon ug ubo aron masabtan sa mga nanambong ang akong gibasa kay basin moingon ang nanambong “wala na ba gyud diay lain?” Sa tinuod lang wala na gyud kay may mga importanteng lakaw ang uban.

Pero ayaw ka mas makatandog sa gibati ang sharing sa among priest presider si Fr. Dalen Cortez, CSsR nga nagshare nga naka-emergency leave siya kay niuli sa iyang mga ginikanan. Makatawa ka maminaw nga nalibog intawon siya unsaon pag-estorya sa mga katigulangan kay ug hinayon di kadungog kay bungol na man ug imo pung kosugon ingnon pud siyag “ayaw kog siyagiti kay di ko bungol!” Nag-ingon siya nga bisan pa man ingon ana sila dapat abli gihapon kita sa pagsabot kanila sa pagmahal kanila. Dili dapat nga magpakabuta-bungol sa ilang mga pangihanglan mintras ania pa sila uban kanato.

Nagpahimangno usab si Fr. Galen nga hinumduman sa kanunay ang mga pahimangno sa mga pagbasa “sa pagka-lig-on ug walay kahadlok”, sa dili pagpili ug mga tao nga amigohon ug alagaran, sa dili pagduha-duha sa pagpangayo ug kaayohan sa mga sakit sa lawas, ug kalag tungod kay walay imposible sa Ginoo, tungod kay ang Ginoo mao ang atong kusog ug siya kanunay nagauban kanato.

Kanimo O Ginoo among pangamuyo ug pagdayeg nga sa tanang panahon sa among kinabuhi, kalipay man o kasakit ikaw gayud magauban kanamo hangtud sa adlaw nga kami mouli na ug balik sa imong sabakan. Amen. (Marieta V. Comighud | OMPH SoCCom)